Պատերազմի վերսկսման հավանականությունը գնալով աճում է․ Արման Մելիքյան

NEWSPRESS.am—ը զրուցել է ՀՀ արտակարգ և լիազոր դեսպան, Արցախի Հանրապետության ԱԳ նախկին նախարար Արման Մելիքյանի հետ։

-Պարոն Մելիքյան, ՀՀ վարչապետ Նիկոլ Փաշինյանը հայտարարեց, որ «Արցախը Հայաստանն» է ու վերջ։ Ըստ Ձեզ՝ ի՞նչ հնարավոր հետևանքներ կարող է ունենալ այս հայտարարությունը՝ հաշվի առնելով, որ այդ հայտարարությանը հետևեց ոչ միայն համահունչ մեկ այլ հայտարարություն Ադրբեջանի նախագահի կողմից, այլև Ալիևը հայտարարել է նաև, որ Փաշինյանի նման դիրքորոշումը բանակցային փուլի տապալում է և սպառնացել է պատերազմով՝ դարձյալ հիշեցնելով, որ Զանգեզուրն ադրբեջանական տարածք է։

-Ալիևն այս անգամ Զանգեզուրը հիշատակել է շատ կոնկրետ աշխարհաքաղաքական համատեքստում: Նա ուղղակիորեն պնդել է, որ Զանգեզուրը թյուրքական աշխարհի տարածքային միասնությունը խախտող գործոն է: Այսինքն՝ Ադրբեջանի նախագահն իրեն է վերապահում թյուրքական աշխարհի տարածքը միավորողի դերը, բայց նաև, այդպիսով, մի կողմից արդարացնում է Հայաստանի նկատմամբ ռազմական ագրեսիա իրականացնելու նպատակը, իսկ մյուս կողմից՝ հայցում թյուրքական այլ պետությունների և առաջին հերթին Թուրքիայի գործնական և բարոյական աջակցությունն այս հարցում: Իր այս հայտարարության նախերգանքը կարող ենք համարել նաև Աշխաբադում Գարեգին Նժդեհի անունն արատավորելուն ուղղված իր խոսքերը:

Մենք էլ պետք է գիտակցենք, որ թեև Արցախը Հայաստան է, այդուհանդերձ Արցախի Հանրապետությունը դեռևս Հայաստանի Հանրապետություն չէ, և այս տեսանկյունից դեռ շատ լուրջ անելիքներ ունենք:

-Ադրբեջանում օրերս հարյուրավոր երիտասարդներ «Ղարաբաղը Ադրբեջանն է» գրությամբ պաստառներով մոտեցել են Արցախի սահմանին։ Սա, թեև ավելի շատ ակցիայի բնույթ էր կրում, բայց կարելի՞ է այն համարել Փաշինյանի հայտարարության արձագանքը: Ի՞նչ նպատակով են արվում դրանք և ի՞նչ հնարավոր հետևանքներ կարող են ունենալ նման ակցիաները։

-Կարծում եմ, որ այո, դա պաշտոնական Բաքվի կողմից կազմակերպված ակցիա էր, որն ուղղված էր վարչապետ Փաշինյանի կողմից հնչեցված պնդման դեմ: Այդ կարգի ակցիաները քարոզչական բնույթ ունեն և առիթ են դարձվում ԶԼՄ-ներում աղմուկ բարձրացնելու համար: Որևէ այլ գործնական հետևանք դրանք չեն կարող ունենալ:

-Ըստ Ձեզ՝ ի՞նչ էր նշանակում այն, որ Փաշինյան-Բակո Սահակյան հանդիպմանը բացակայում էր Արցախի դրոշը, և այն, որ Փաշինյանը Սահակյանին «մարզպետ» անվանեց։ Նախկինում եղե՞լ են նման դեպքեր և ինչով են դրանք բացատրվել։ 

-Թեև շրջանառության մեջ դրված տեսագրությունում մարզպետ բառը լսվում է, այդուհանդերձ, համոզված էի, որ վարչապետ Փաշինյանը չէր կարող Արցախի Հանրապետության նախագահին այդկերպ դիմել և այս դեպքում գործ ունենք կամ տեխնիկական միտումնավոր հնարքի, կամ էլ խոտանի հետ: Վարչապետի մամլո խոսնակն այս հարցի հետ կապված պարզաբանումը տվեց՝ ասաց, որ մարզպետ բառը չի արտաբերվել, իսկ համապատասխան հեռուստաընկերությունն էլ կատարվածի համար ներողություն է խնդրել:

Ինչ վերաբերում է դրոշի խնդրին, ապա սա, որքան հասկանում եմ, արարողակարգային հարց է՝ Երևանում բարձր մակարդակի երկկողմ հանդիպումների ժամանակ դրված են լինում Հայաստանի Հանրապետության դրոշը և զինանշանը, իսկ Ստեփանակերտում՝ Արցախի Հանրապետության պետական խորհրդանիշները:

-Դուք կիսո՞ւմ եք Վիտալի Բալասանյանի այն մտահոգությունը, որ Հայաստանում տիրող լարվածությունն ու բևեռացումը տեղափոխվում է Արցախ։ Կա՞ արդյոք սպառնալիք՝ ուղղված Արցախի անվտանգությանն ու սուվերենությանը։

-Իսկապես, որոշակի լարվածություն է զգացվում և անխուսափելի է այն, որ եթե Երևանում տարբեր քաղաքական խմբավորումների միջև դիմակայությունը սրվում է, ապա այդ երևույթն իրեն զգալ է տալու նաև Ստեփանակերտում: Ինչ-որ առումով մենք գտնվում ենք քաղաքական զարգացման անցումային փուլում, ինչպես ներքաղաքական, այնպես էլ ընթացիկ աշխարհաքաղաքական գործընթացների համատեքստում:

-Պարոն Մելիքյան, այս փուլում պատերազմի հավանականություն տեսնո՞ւմ եք։

-Լայնածավալ պատերազմի վերսկսումը կարող է տեղի ունենալ տարածաշրջանային զարգացումների ընդհանուր համատեքստում: Հաշվի առնելով այն հանգամանքը, որ պատերազմական բռնության ալիքն աստիճանաբար շարժվում է Հարավային Կովկասի և Իրանի ուղղությամբ, ապա կարելի է ասել, որ նաև մեզ համար պատերազմի վերսկսման հավանականությունն է գնալով աճում:

Դա չի նշանակում, որ պատերազմն անխուսափելի է, սակայն դրա մեջ չներքաշվելու համար լրացուցիչ քաղաքական ու դիվանագիտական ջանքեր պետք է գործադրենք, ինչպես նաև անդադար աշխատենք մեր ռազմական կարողությունների կատարելագործման և ընդլայնման ուղղությամբ:

Զրուցեց Արմինե Մկրտումյանը