Բացահայտվել են ավտոմեքենաների սրահներից կատարված հափշտակության դեպքեր

ՀՀ քննչական կոմիտեի ԵՔՔՎ Աջափնյակ և Դավթաշեն վարչական շրջանների քննչական բաժնում ավարտվել է ուրիշի գույքը գաղտնի հափշտակելու դեպքի առթիվ հարուցված քրեական գործի նախաքննությունը: Մեղադրանք է առաջադրվել 1979թ. և 1985թ. ծնված Երևան քաղաքի երկու բնակչի։

Նախաքննության ընթացքում ձեռք բերված տվյալների համաձայն՝ Երևան քաղաքի 39-ամյա և 34-ամյա երկու բնակիչներ, 2019 թվականի հուլիս-օգոստոս ամիսներին, ուրիշի գույքը հափշտակելու շուրջ նախնական համաձայնության գալով, ապօրինի մուտք են գործել Երևան քաղաքի Բաշինջաղյան, Լենինգրադյան փողոցների բակերում կայանված ավտոմեքենաների սրահներ, հափշտակել գազի գլանանոթներ, գումար և սրահում առկա տարբեր արժողության իրեր՝ քաղաքացիներին պատճառելով զգալի չափերի գույքային վնաս:

Բացի այդ, նշված անձինք 2019թ. օգոստոսի 25-ին, ժամը 03.00-ի սահմաններում, Երևան քաղաքի Լենինգրադյան փողոցի բակում կայանված ավտոմեքենայի հետևի դռան փոքր ապակին կոտրելու միջոցով մուտք են գործել սրահ, սակայն չեն կարողացել հանցագործությունն ավարտին հասցնել, քանի որ հայտնաբերվել և բերման են ենթարկվել Մաշտոցի բաժին:

Ձեռք բերված ապացույցների համակցությամբ՝ 1979թ. ծնված տղամարդուն մեղադրանք է առաջադրվել՝ ՀՀ քրեական օրենսգրքի 177-րդ հոդվածի 2-րդ մասի 1-ին և 3-րդ կետերով /2 դրվագ/, 177-րդ հոդվածի 2-րդ մասի 1-ին կետով և 34-177-րդ հոդվածի 2-րդ մասի 1-ին և 3-րդ կետերով, իսկ 1985թ. ծնված տղամարդուն՝ ՀՀ քրեական օրենսգրքի 177-րդ հոդվածի 2-րդ մասի 1-ին և 3-րդ կետերով, 177-րդ հոդվածի 2-րդ մասի 1-ին կետով և 34-177-րդ հոդվածի 2-րդ մասի 1-ին և 3-րդ կետերով: Նրանց նկատմամբ որպես խափանման միջոց է ընտրվել ստորագրություն չհեռանալու մասին :

Նախաքննությունն ավարտվել է, և քրեական գործը՝ մեղադրական եզրակացությամբ, ուղարկվել նախաքննության օրինականության նկատմամբ հսկողություն իրականացնող դատախազին:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: