Սեյրան Օհանյանը Թուրքիայի կողմից ռուսական օդանավի խոցման մասին

«Այն պահին, երբ միջազգային հանրության ուշադրությունը սևեռված է միջազգային ահաբեկչության հետ պայքարի վրա, նման գործողությունները հարված են այդ ջանքերին»:

Այս մասին լրագրողների հետ զրույցում հայտարարեց ՀՀ Պաշտպանության նախարար Սեյրան Օհանյանն` անդրադառնալով Թուրքիայի օդուժի կողմից թուրք-սիրիական սահմանին ռուսական «Սու-24» օդանավը խոցելու հարցին.

Նա նկատեց, որ Հայաստանն ու Ռուսաստանը ռազմավարական գործընկերներ են, եւ դա պայմանավորում է մեր հարաբերությունները:

«Ռուսաստանի Դաշնության հետ մենք ունենք ընդանուր օպերատիվ մարտական պլանավորում, որի շրջանակներում իրականացնում ենք մեր ընդհանուր գործունեությունը: ՌԴ համապատասխան բազայի մասնակցությունն այդտեղ ընդհանրացնում է անվտանգության ապահովման խնդիրները: Կարծում եմ, որ այս պլանների շրջանակներում էլ մենք այսօր գործում ենք»,- նկատեց նախարարը:

«Հարկավոր է  սպասել իրադարձությունների հետագա զարգացմանը: Համապատասխան ղեկավարները, կարծում եմ, որոշումներ կընդունվեն, իսկ միջազգային հանրության ջանքերը պետք է ուղված լինեն նրան, որ սրացումներ չլինեն»,- ասաց Սեյրան Օհանյանը:

Հարցին, թե հնարավո՞ր է արդյոք, որ Հայաստանի հակաօդային պաշտպանության համակարգի եւ ՀՀ տարածքում ռուսական ՀՕՊ ստորաբաժանումները բարձր պատրաստվածության բերվեն, նա նշել է, որ համապատասխան ստորաբաժանումները գործում են ըստ պլանի: