Ինչու՞ Արարատ Միրզոյանն անդրադարձավ Անդրանիկ Քոչարյանի՝ ոչ-կոռեկտ հայտարարությանը

ԱԺ նախագահ Արարատ Միրզոյանն այսօր անդրադարձել է ԱԺ պատգամավոր, Պետաիրավական հարցերի մշտական հանձնաժողովի նախագահ Անդրանիկ Քոչարյանի ձևակերպմանն՝ ուղղված ԱԺ նախկին փոխնախագահ Արփինե Հովհաննիսյանին, ասելով, որ այն գեղեցիկ չէր։ «Բայց վերջին ամիսներին մենք Հայաստանում տեսնում ենք բանավեճների, քննարկումների մեջ ոչ-վայելուչ ձևակերպումներ, որոնց կարիքը չկա: Կարելի է բովանդակալից խոսել, ես կոչ եմ անում բոլորին քննադատության, քաղաքական բանավեճի ընթացքում պահպանել կոռեկտության սահմանները»,- ասել է ԱԺ նախագահը։

Նա նաև հավելել է, որ Արփինե Հովհաննիսյանի կողմից Դանիել Իոաննիսյանին վիրավորելը, արդարադատության նախարար Ռուստամ Բադասյանին «անուղեղ» անվանելը կամ որևէ նման այլ որակումներ տալը որևէ մեկին հիմք չեն տալիս նույն բառապաշարով, նույն կերպ հակադարձել նրան, տգեղ է: Հետաքրքրական է այն, որ Արարատ Միրզոյանը կողմ չէ, որ հարցի առնչությամբ զբաղվի ԱԺ Էթիկայի հանձնաժողովը։ Նա գտնվում է, որ Էթիկայի հանձնաժողովը չափազանց լուրջ դեպքերի համար է, չնայած, ըստ նրա, սա էլ է լուրջ դեպք: Այդուհանդերձ, ունի մտավախություն, որ նման պրակտիկայի զարգացման դեպքում Էթիկայի հանձնաժողովը կարող է դառնալ մահակ պատգամավորների գլխին ու կաշկանդել նրանց այս կամ այն հարցում դիրքորոշում հայտնելու հետ կապված։

Ինչ խոսք, այն, որ Արարատ Միրզոյանը անդրադարձավ այս հարցին, ինքնին կարևոր է ու հետաքրքրական․ խորհրդարանական կառավարման համակարգ ունեցող երկրում առաջնային մանդատ ունեցող սահմանադրական մարմնի ղեկավարի կողմից նման անդրադարձը արդեն իսկ հարցին մեծ կարևորություն է տալիս։

Մասնավորապես Հայաստանի դեպքում, ինչ որ իմաստով Արարատ Միրզոյանն այսպիսով նաև արտահայտեց Նիկոլ Փաշինյանի մոտեցումը, քանի որ դժվար թե նա կարծիք հայտներ, այն էլ իր թիմակցին թեթևակի քննադատելով, առանց Փաշինյանի հետ համաձայնեցնելու։ Ուստի հետաքրքիր է, թե ինչու որոշեց Միրզոյանը նման հայտարարություն անել, ու արդյոք այն զուտ քաղաքական կոռեկտության պաշտպանության անհրաժեշտությունից է գալիս, թե կան այլ խնդիրներ։

Իրականում, երբ Ֆրանսիայի դեսպանն արձագանքեց նույն խնդրի առնչությամբ ՀՀ ՄԻՊ Արման Թաթոյանի գրառմանը և ծավալուն մեկնաբանությանը, որն արվել էր այլ առիթով մի քանի օր առաջ, արդեն հասկանալի է, որ եվրոպական կառույցների մոտ այս բանավեճը առաջացրել է որոշակի հետաքրքրություն հատկապես՝ կին քաղաքական գործչի հանդեպ նեգատիվ խոսքի կիրառման մասով։ Այս համատեքստում լիովին հասկանալի է, որ face save-ի տեսակետից ելնելով, նման հայտարարություն պետք է հնչեր գոնե պառլամենտի նախագահի մակարդակով, որքան էլ այն լիներ «սուր անկյունները հղկած»։

Յակոբ Բերգեր