Նախարարը «հարց լուծող չէ», պաշտոնն էլ վարձատրություն է «քայլելու» դիմաց

Այսօր Ազգային ժողովի մուտքի մոտ «Ղեկը աջ» նախաձեռնության անդամները բողոքի ակցիա են կազմակերպել։ Նրանք պահանջել են վերանայել աջ ղեկով մեքենաների ներկրման և օգտագործման մասին օրենքը և փոփոխության ենթարկել այն։

Նրանք նախ իրենց խնդրով դիմել են «Ելք» խմբակցության պատգամավոր Էդմոն Մարուքյանին, ով, սակայն, իր պատասխաններով մեծ հույս չի ներշնչել։ Պատգամավորը պարզապես, ընդհանուր մոտեցմամբ, նկատել է, թե՝ այո՛, խնդիրը կա և լուծում է պահանջում, ու ոչ ոք իրավունք չունի քաղաքացուն որևէ բան պարտադրել։

Սա, իհարկե, ոչ թե խոստումնալից հայտարարություն էր, այլ ավելի շատ թերևս վարորդներին ամբողջապես չհուսահատեցնելու և չհիասթափեցնելու փորձ։ Հատկապես այն բանից հետո, երբ Տրանսպորտի, կապի և տեղեկատվական տեխնոլոգիաների նախարարի ժամանակավոր պաշտոնակատար Հակոբ Արշակյանը վարորդներին հորդորեց այս հարցում իր վրա հույս չդնել։ Նա այդպես էլ հայտարարեց․ 

«Ձեր հարցը լուծողը ես չեմ, օրենքն արգելում է աջ ղեկով մեքենաների ներկրումը»։

Իհարկե, նախարարն ինքը միայնակ չի կարող այս հարցը լուծել, բայց նա կարող է հարցը դնել կառավարության քննարկմանը, որից հետո համապատասխան ընթացակարգ կմշակվի և այն կներկայացվի ԱԺ։ Բայց նախարարի ժ/պ-ն գերադասել է միանգամից ձեռքերը լվանալ գործից ու այն իրենից հեռացնել՝ հայտարարելով, թե «լուծման միակ տարբերակն Ազգային ժողովի կողմից օրենքում փոփոխություններ կատարելն է, ինչը ժամանակատար է»:

Սա նրա առաջին գնդակն էր՝ ուղղված աջ ղեկով մեքենաների վարորդներին։ Երկրորդ գնդակով նա հայտարարեց, թե աջ ղեկով մեքենաների արգելքի վերացմանը դեմ են նաև ոստիկանությունը, ԱԻՆ-ը և հենց իրենց նախարարությունը։

Արշակյանը, որպես Տրանսպորտի նախարար, ըստ էության, կրկնեց ոստիկանության հայտարարությունը, թե՝ «Ոստիկանությունը գտնում է, որ աջ ղեկով մեքենաները  վտանգավոր են ու ես՝ որպես նախարար, կարող եմ ասել, որ մեր ճանապարհների ամբողջ կահավորանքը ձախ ղեկով մեքենաների համար է»։

Հակոբ Արշակյանը կրկնեց իր այն տեսակետը, որ վարորդները պետք է գոնե հետևեին գործի ընթացքին, քանի որ «ժամանակավոր» եզրույթն ինքնին արդեն պետք է կասկածելի թվար։

Նախ, չի քննարկվում այն, որ եթե նախարարն իսկապես «հարց լուծող չէ», ապա ի՞նչ գործ  նրան տվել է միայն որպես վարձատրություն՝ «քայլելու դիմաց»․․․

Եվ ի վերջո, այսօր երկրի ղեկը ստանձնել է այն քաղաքական ուժը, ով ժամանակին դեմ է քվեարկել աջ ղեկով մեքենաների ներկրման արգելքին։ Այնպես որ՝ այսօր շատ հանգիստ վարչապետի ժ/պ Փաշինյանը կարող է լուծել այդ հարցը՝ գոնե վարորդների աչքին թոզ փչելու և իր պոպուլիստական դիրքը չկորցնելու համար, խնդիրը կառավարության քննարկմանը դնելով։

Սակայն ո՛չ այսօր ու ո՛չ էլ վաղն այս խնդիրը թերևս քննարկման չդրվի․ մի կողմից այսօրվա կառավարությունն արդեն խոստովանել է և շարունակում է խոստովանել, որ նախկին իշխանությունն այս հարցում սխալ չի եղել։ Մյուս կողմից էլ՝ այսպես, թե այնպես, ԵՏՄ անդամակցությունը ենթադրում է՝ 2020 թվականից արգելել աջ ղեկով մեքենաների ներկրումը։ Ուստի կառավարությունը թերևս չի ցանկանում ժամանակ վատնել այն «մանր-մունր» հացերի համար, որոնց ճակատագիրն արդեն իսկ որոշված է։ Այս պարագայում արդեն արդարացվում են նախարարի ԺՊ-ի խոսքերը, թե ինքը «հարց լուծող չէ», և բնական է, որ նրա բոլոր արդարացումներն ու պատասխանները պետք է լինեն անհեթեթ հայտարարություններով․․․