Միայն թե մարդկանց խնդիրները դարձյալ «սառույցին չգրվեն»... Փաշինյանը լսեց որդուն կորցրած կնոջը

Այսօր կառավարությունում առաջին անգամ վարչապետի պաշտոնում Նիկոլ Փաշինյանը կանցկացնի կառավարության նիստը:

Ինչպես ամեն անգամ, այսօր՝ մայիսի 11-ին ևս քաղաքացիներն իրենց խնդիրներով հավաքվել էին կառավարության շենքի դիմաց:

Փաշինյանը մտավ կառավարության գլխավոր մուտքից և զրուցեց նրանցից մի քանիսի հետ:

Նրան մոտեցավ Սյունիքի մարզի Կապան համայնքից Երևան եկած Էմմա Հարությունյանը: Կնոջ տղան՝ 30-ամյա Արա Խաչատրյանն, արդեն 7 տարի է, ինչ կորել է: NEWSPRESS.am-ը բազմիցս անդրադարձել է տիկնոջ բարձրացրած խնդրին:

2011 թվականի հունիսի 2-ին տղային իր աչքի առաջ ընկերները վերցրել են, տարել, բայց այսօր պատկան մարմինները հայտարարում են, թե իբր տղան անհայտ կորած է: Էմմա Հարությունյանը մեզ հետ զրույցում մի քանի անգամ արդեն պնդել է, որ տղային առևանգել են:

Այս անգամ էլ նա խնդրեց նոր վարչապետին զբաղվել իր տղայի խնդրով:

Փաշինյանը զանգահարեց արագ արձագանքման օպերատիվ խմբին, տվեց կնոջ անունը, հանձնարարեց զբաղվել խնդրով և մտավ կառավարության շենք:

Այս պահը թերևս հիշեցրեց նախկին վարչապետ Կարեն Կարապետյանի պաշտոնավարման առաջին օրերը, երբ նա համբերատար լսում էր իրեն դիմած բոլոր քաղաքացիներին ու համապատասխան հանձնարարականներ տալիս՝ նրանց օգնելու համար:

Դրանից մեկ ամիս էլ չանցավ, երբ ՀՀԿ կլանը քաշեց նրան իր մեջ, ու քաղաքացիների խնդիրների լուծման հույսերը «սառույցին գրվեցին»: