Եռամսյա հավաքները տղամարդկանց համար կդառնան 25-օրյա, կանանց համար՝ 15

ՀՀ պաշտանության նախարար Սուրեն Պապիկյանն այսօր Կառավարության նիստի ժամանակ հայտարարեց, որ Կառավարությունը մտադիր է հրաժարվել եռամսյա հավաքների անցկացումից։ Փոխարենը հավաքները դառնում են 25-օրյա՝ 7 օր քաղաքացին անցնում է պատրաստություն, 14 օր իրականացնում է մարտական հերթապահություն:

Նրա խոսքով՝ շուտով կարգը կլինի, և առաջիկա հավաքները կլինեն 25-օրյա. «Դա կլինի պարտադիր ՀՀ բոլոր զինապարտ քաղաքացիների համար։ Քաղաքացիներին էլ հնարավորություն կտրվի ընտրել հավաքի ժամկետը»,- ասաց նա:

Նիկոլ Փաշինյանն էլ նկատեց, որ եռամսյա հավաքների քաղաքականությունը վարելիս, որոշել են հրավիրել հատկապես այն մարդկանց, ովքեր աշխատանք չունեն:

«Սա ինչ-որ առումով սոցիալական նշանակություն ուներ, որովհետև եռամսյա հավաքի մասնակիցները նաև վճարվում են: Հետագայում եկանք եզրակացության, որ դա այնքան էլ արդյունավետ չէ, և պետք է հավաքները դարձնել մեկամսյա»,- նշեց Փաշինյանը:

Պապիկյանը նշեց, որ քանի որ կանայք ևս ցանկանում են մասնակցել հավաքներին, ուստի ՊՆ-ն հայտարարությամբ հանդես կգա:

«Արդեն մշակված նախագիծ ունենք, որ ՀՀ քաղաքացի իգական սեռի ներկայացուցիչները կարող են հերթագրվել ու համապատասխան հրաձգարաններում անցնել մարտական զենքից կրակային պատրաստություն, իհարկե, ըստ ցանկության»,- ասաց նախարարը:

Նիկոլ Փաշինյանն էլ ասաց, թե կանայք հավաքների կարող են մասնակցել 7 կամ 15 օր: