Վերաօծվեց Կուրթանի Եկեղեցին. Ուխտավորներին մատուցվեց 7 գառան մատաղ

Լոռու մարզում վերաօծվեց ևս մեկ եկեղեցի: Կուռթանի պատմական սուրբ Աստվածածին եկեղեցին դարձավ միակ գործող սրբավայրը Կուրթան համայնքում: Վերջին տարիներին երկար ձգձգվող վերոնորոգման աշխատանքները սպասումի մեջ էին պահում համայնքին, ովքեր անհամբերությամբ էին սպասում եկեղեցու շինարարական աշխատանքների ավարտին:

Վերանորոգման աշխատանքների ողջ ընթացքում եկեղեցում չեն դադարել նշվել եկեղեցական տոները, կատարվել են պսակի, մկրտության արարողություններ: Այսօր արդեն եկեղեցին լիովին պատրաստ է ծառայել համայքնին:

Գուգարաց թեմի առաջնորդ Տեր Սեպուհ արքեպիսկոպոս Չուլջյանի ձեռամբ վերաօծվեց Կուրթան համայնքի պատմական Սուրբ Աստվածածին եկեղեցին և այն արդեն լիովին պատրաստ է ընդունելու Կուրթանի և հարակից համայնքների բնակիչներին:

Տեղացիները պատմում են, որ 5-6-րդ դարերին թվագրվող այս եկեղեցին, 30-ականներին պայթեցրել են, որի հետևանքով պատերը մասնակի փլուզվել են, քարե ծածկը քանդվել: Արդեն 80-ակնների սկզբին Հուշարձանների պահպանության վարչության կողմից եկեղեցին մասամբ վերականգնվել է: Իսկ վերջերս էլ մի շարք բարերների շնորհիվ վերջապես այն վերակառուցվեց:

Եկեղեցու վերանորգման նախաձեռնությունը Կուրթան համայնքի ղեկավար Մհեր Գևորգյանինն է: Նա ոչ միայն կազմակերպել ու ղեկավարել է եկեղեցու վերանորոգումը, այլև իր նյութական միջոցներով եկեղեցու տարածքում կատարել է հողահեռացման և մաքրման մեծածավալ աշխատանքներ, տեղադրել է Սուրբ Սեղանը: Վերջինիս սպասքը, ինչպես նաև եկեղեցու վարագույրները, մոմակալներն ու զանգակատան խաչը տրամդրվել է Գուգարաց թեմի առաջնորդարանի կողմից:

Եկեղեցու բացման օրը տարածաշրջանի հոգևոր հովիվ Տեր Մերուժան քահանա Սողոյանի ձեռամբ եկեղեցու նորաօծ խորանին մատուցվեց Սուրբ Պատարագ: Շնորհավորանքի խոսքն ուղղելով ներկաներին՝ սրբազան հայրը օրհնության գիր ու սրբապատկեր նվիրեց Կուրթանի համայնքապետ Մհեր Գևորգյանին:

Եկեղեցու վերաօծման առիթով ուխտավորներին մատուցվեց 7 գառան մատաղ: