Ի՞նչ գործ ունի Տոնոյանը Սերժի Վաչոյի մտերիմ «Պատրոն Դավիթի» հետ

Բոլորովին վերջերս հպարտությամբ արձանագրեցինք, որ Հայաստանում «Կալաշնիկով» ինքնաձիգի АК-12 և АК-15 տեսակների արտադրություն է հիմնվելու:

Օգոստոսի 21-ին Մոսկվայում Royalsys Engineering ltd. ընկերության և «Կալաշնիկով» կոնցեռնի միջև ստորագրվեց պայմանագիր՝ Հայաստանում Կալաշնիկովի ինքնաձիգի նոր նմուշների արտադրություն հիմնելու մասին։

Քանի որ պայմանագիրը ստորագրեց ՀՀ պաշտպանության նախարար Դավիթ Տոնոյանը, ուստի մամուլը ջանք ու եռանդ չխնայեց այս գործարքը Տոնոյանի ձեռքբերում համարելու համար:

Ըստ ստորագրված պայմանագրի՝ հայկական մասնավոր ընկերության կողմից Հայաստանում ռուսական զենք կարտադրվի:

Սա, անշուշտ, ոգևորող հանգամանք կարելի էր դիտարկել, եթե այդ մասնավոր ընկերությունն ունենար անբիծ անցյալ ու ղեկավար, բայց արի ու տես, որ Հայաստանում ռուսական զենքի արտադրությունը տրվել է մի ընկերության, որի մասին համացանցում կան բազմաթիվ մութ պատմություններ:

Եվ այսպես. այդ մասնավոր ընկերությունը «Դի Ջի Արմս Քորփորեյշն» ՓԲԸ-ն է՝ իր սեփականատեր Դավիթ Գալստյանով, որն ավելի ուշ ներկայանում է որպես «Royalsys Engineering» Ltd․ ընկերության նախագահ, հայտնվել է արդեն դատարաններում, ԴԱՀԿ-ում և անգամ ՄԱԿ-ի ուշադրության կենտրոնում:

Օրինակ՝ այս ընկերության և Ուկրաինայի նախագահ Պյոտոր Պորոշենկոյի ու նրա հետ փոխկապակցված անձանց օֆշորային ընկերությունների միջոցով փողերի լվացման գործարքներ են կատարվել:

Գործարքը կնքվել է Գալստյանին ու Պորոշենկոյին ներկայացնող «Դի Ջի Արմս Քորփորեյշն» ՓԲԸ-ի և UKRINMASH-ի միջև, սակայն գումարի փոխանցումը կատարվել է նույն անձանց հետ կապված 2 բոլորովին այլ ընկերությունների՝ օֆշորային «Mosston Engineering» ltd.-ի և IMECO-ի միջև։

Դավիթ Գալստյանի հետ կապված հաջորդ մտահոգիչ հանգամանքն այն է, որ նա հասցրել է հայտնվել ՄԱԿ-ի և ԱՄՆ-ի «սև ցուցակներում» «Դի Ջի Արմս Քորփորեյշն» ՓԲԸ-ով զենքի անթույլատրելի վաճառքով զբաղվելու համար:

Դավիթ Գալստյանին պատկանող այս ընկերության գործը հասել է նաև ԴԱՀԿ ծառայությանը. պարզվում է, որ «Դի Ջի Արմս Քորփորեյշն» ՓԲԸ-ն նաև «ՈՒԿՐԻՆՄԱՇ» առևտրային ֆիրմային պարտք է 1.290.000 ԱՄՆ դոլարին համարժեք ՀՀ դրամ և 64.380 գրիվնա. սա Պյոտոր Պորոշենկոյի անվան հետ կապվող նույն ընկերությունն է, որին Դավիթ Գալստյանի ընկերության կողմից 275,000 եվրոյի վճար է կատարվել։

Գալստյանի ընկերությունը նաև հասցրել է տապալել Հայաստանում գործող փամփուշի գործարանի աշխատանքները․ նա խոստացել էր 40 մլն դոլարի ներդրում իրականացնել, բայց այդ խոստումը մնաց օդում կախված, իսկ գործարանն էլ փակվեց։

Այսպիսով, պարզապես անհասկանալի է, թե ինչու է Դավիթ Տոնոյանը պետության համար այս կարևոր նախագծում ներգրավվել արդեն իսկ անվանարկված Գալստյանին, չէ՞ որ դա իր մեջ լրջագույն ռիսկեր է պարունակում:

Նախ՝ այն, որ փամփուշի գործարանն իր թեթև ձեռքով փակվեց և ոչնչացվեց (հենց դրա համար էլ ստացավ «Պատրոն Դավիթ» մականունը), իսկ Գալստյանն այդ ընթացքում հարստացավ, դրան գումարած հարստացրեց նաև իր ամուսնության քավոր Վաչագան Ղազարյանին՝ Սերժի Վաչոյին, ում հետ հետագայում նաև կրկնակի քավորացավ՝ դառնալով նաև Վաչոյի դստեր կնքահայրը: Նշենք, որ ըստ հավաստի տեղեկությունների՝ հենց Դավիթ Գալստյանն է վճարել Վաչագան Ղազարյանի ազատության համար պահանջվող գրավն ամբողջությամբ։

Դավիթ Գալստյանի կյանքի ամոթալի էջերից է նաև Ղազախստանում իր գործունեությունը: Զենքի վաճառքին զուգահեռ՝ այս մարդն ունենում է նաև գիշերային ակումբ և Ալմաթայում ստանում՝ «Սուտինյոր Դավիթ» մականունը:

Այսօր այս մարդը մեր երկրի Պնախարար Դավիթ Տոնոյանի կողքին է, զբաղվում է պետության համար առանցքային նշանակության ոլորտի կուռացիայով, մասնակցում է Տոնոյանի հանդիպումներին:

Օրինակ՝ Դավիթ Գալստյանն օրերս ներկա էր նաև «Կալաշնիկով» կոնցեռնի գլխավոր տնօրենի տեղակալ Անդրեյ Բարիշնիկովի ղեկավարած պատվիրակության Դավիթ Տոնոյանի հետ հանդիպմանը: Ի դեպ, Ղազախստանից Դավիթ Գալստյանի Հայաստան տեղափոխվելու առնչությամբ հրավիրում ենք իրավապահների ուշադրությունը. բերվող փողերի հետ կապված ևս կա իրավապահների զգոնության անհրաժեշտություն։ Վերջում հավելենք, որ, ըստ մեր տեղեկությունների, այս մութ պատմություններից անտեղյակ է վարչապետ Նիկոլ Փաշինյանը, ուստի նրան ևս զգոնության կոչ ենք անում։

Շարունակելի...

NEWSPRESS.am