Ե՞րբ է գալու պատասխան տալու գրողի տարած ժամանակը. երբ GPS-ը որոշի, որ Հայաստանն Ադրբեջա՞նն է․ «Ձեզ ճի՛շտ չեք պահում, համը հանում եք․․․», պարո՛ն նախարար

Պաշտպանության նախարար Վաղարշակ Հարությունյանը, որն ի դեպ, երեկ չէ նախարար դարձել ու ոլորտին էլ 5 մատի պես ծանոթ է՝ երկրի համար օրհասական պահին հայտարարում է, թե հարցերին կպատասխանի, երբ ժամանակը գա․․․ ու տառացիորեն փախչում է լրագրողներից։

Սա այն դեպքում, երբ Արցախի պարտությունը վերագրում են հայկական բանակին ու տեղից ամեն մի վերկացող անլվա, ցինիկաբար հայտարարում է, թե բանակ չենք ունեցել, կամ կռվող չի եղել․․․

Սա այն դեպքում, երբ երկրի համար վտանգավոր պահին, բոլորը փորձում են արժեզրկել բանակն ու կոտրել բանակի մեջքը․․․

Սա այն դեպքում, երբ մեկը մյուսի հետևից թշնամուն են հանձվում տարածքներ՝ Հայաստանից։ Կտրվել է Հայաստանի քարտեզի պոչը՝ արմատախիլ անելով Հայաստանի անվտանգությունն ապահովող դարպասները․․․

Սա այն դեպքում, երբ առկա է գերիների վերադարձի խնդիր․․․

Սա այն դեպքում, երբ այսօր էլ խոսք է բացվել Ներքին Խնձորեսկն ադրբեջանցիներին հանձնելու մասին։ Գյուղապետն էլ հաստատել է, որ Ներքին Խնձորեսկում տեղի են ունենում պետական սահմանի ճշտման և հստակեցման աշխատանքներ՝ GPS-ի միջոցով․․․

Սա այն դեպքում, երբ զուգահեռ նաև խոսք է բացվել Արարատի մարզի Տիգրանաշեն գյուղի (Քյարքիի) բնակիչների տարհանման ու հանձնման մասին․․․ 

Այս հրատապ հարցերն էին, որ առաջադրվեցին լրագրողների կողմից պաշտպանության նախարարին ու մնացին անպատասխան. թե դրա ժամանակը չէ․․․

Իսկ ե՞րբ է ժամանակը, պարոն նախարար․․․ իսկ ո՞վ է այս հարցերին պատասխանելու և հստակեցնելու դրանք․․․ դուք ինչո՞վ եք առավել ձեր նախորդից, ով, իր թիմի հետ, 44 օր հանրության քթից բռնած խաբեց ու թշնամուն հանձնեց երկիրը։ Դուք նշանակվել եք հերթական 44 օրը՞ պարգևելու և Հայաստանի մնացած կտորների՞ց էլ զրկելու հայերին․․․ 

Ե՞րբ է գալու այդ գրողի տարած ժամանակը, որին բոլորդ սպասեցնել եք տալիս։ Այսօ՛ր պետք է խոսել ու բացատրել, որպեսզի հասարակությունը դարձյալ չմնա անորոշության մեջ ու չխարխափի մթության մեջ․․․ 

Դո՛ւք, պարո՛ն նախարար, փորձում եք մոլորեցնել մի ամբողջ ազգի ու փախչել հարցերից՝ թաքնվելով ձեր «ախրանիկի» հետևո՞ւմ, ով վիրավորում է երկրի համար կարևոր այս հարցերն առաջ քաշած լրագրողներին՝ հոխորտալով, թե «Ձեզ ճիշտ չեք պահում, համը հանում եք․․․»:

Մինչդեռ լրագրողներից յուրաքանչյուրը, Ձեզ հարցն ուղղելիս բառացիորեն աղերսագին խնդրում էր պատասխանել․ «Կներեք պարոն նախարար, խնդրում ենք, պարոն նախարար, խնդրում ենք․․․»։ Գիտե՞ք ինչու, որովհետև նրանք իրապես մտահոգված են իրենց հայրնիքի ճակատագրով, որովհետև սա նաև իրենց հողն է, իրենց տունը, որի հետ Դուք վարում ենք այնպես, ինչպես ցանկանաք՝ առանց տեղեկացնելու այդ երկրի իրական տերերին։ Զարթում ենք և իմանում՝ այս մեկի տունն էլ GPS-ի միջոցով մտավ ադրբեջանի տարածք՝ զավեշտ ու ողբերգություն․․․

Հայրենի հողը սկսել է երերալ մեր ոտքերի տակ, ու Դուք ասում եք, թե դրա մասին խոսելու ժամանա՞կը չէ․․․

Այդ Դուք Ձեզ ճիշտ չեք պահում, ու համը վաղուց արդեն հանել եք, երբ մտել եք կեղտոտ խաղերի մեջ ու դավաճանել եք Ձեր ժողովրդին․․․

Դավաճանությունը հենց սա է, որ կա՝ գործել թիկունքում, գաղտագողի ու մի ամբողջ ազգի մոլորեցնելով՝ տնավեր անել․․․

Արմինե Մկրտումյան