«Ինձ գյուղապետարանից սպառնացել են, թե տունդ կվառենք, քեզ կվերացնենք»․ Վաղաշենի գյուղապետի և գյուղացիների միջև լարված վիճակ է

Գեղարքունիքի մարզի Վաղաշեն գյուղի բնակիչները պահանջում են գյուղապետ Արթուր Սուվարյանի հրաժարականը։ Գյուղացիներն ահազանգել են NEWSPRESS.am-ի խմբագրություն և հայտնել, որ գյուղապետն իրեն շրջապատել է իր հարազատներով և արդեն 13 տարի գումարներ է մսխում։ 

Մեզ հետ զրույցում գյուղապետարանի աշխատակից Պարգև Ալեքսանյանը հայտնեց, որ բնակիչները հուլիսի 4-ին ոռոգման ջրի խնդրով փակել են Մարտունի-Երևան ճանապարհը: Նա վստահեցնում է, որ մինչ օրս իրենց գյուղում ոռոգման ջուր չլինելու պատճառը գյուղապետն է, ով իր անձնական շահի համար է ստանձնել գյուղի ղեկավարի պաշտոնը։ Պարգև Ալեքսանյանը մատնանշում է նաև իրենց գյուղապետի մասին առաջին փոխվարչապետ Արարատ Միրզոյանի կողմից, դեռ պատգամավորության ժամանակ ֆեյսբուքյան էջում արված գրառումը։ Միրզոյանը գրել էր՝

«Այս տարիների ընթացքում Վաղաշենում և հարևան համայնքներում զանազան ջրագծեր են անցկացվել։ Զարմանալի զուգադիպությամբ պարզեցված ընթացակարգով մրցույթներում պարբերաբար հաղթող է ճանաչվել «Սուվարյան շին» ՍՊԸ-ն, որի տնօրենի անունն, ի դեպ, Գրիշա Տիգրանի Սուվարյան է»։

Ոռոգման ջրի խնդիրը մինչ օրս գյուղում լուծված չէ։ Անգամ երեկ՝ հունիսի 4-ին, գյուղացիներն այս խնդրով փակել են Մարտունի-Երևան ճանապարհը: Պարգև Ալեքսանյանը պատմում է, որ գյուղապետի հայրն իրեն խփել է և մեղադրել ակցիան կազմակերպելու մեջ։ 

«Մանվելի նույն բաներն էստեղ է կատարվում (նկատի ունի Մանվել Գրիգորյանի պահելաձևը,-խմբ․)․․․ Հերը հարձակվեց վրես ու խփեց, էն մի կողմից էլ հորեղբոր տղան հարձակվեց-խփեց․ ինձ սպառնում են, ասում են տունդ կվառեմ, քեզ կվերացնեմ, մեքենայիս ապակին խփեց-ջարդեց․․․»,- պատմում է Պարգև Ալեքսանյանը։

Գյուղապետ Արթուր Սուվարյանը թեև սկզբում մեզ չցանկացավ պարզաբանումներ տալ՝ պատճառաբանելով, որ հեռախոսով չի ուզում խոսել, այնուամենայնիվ, հաջորդ 15-20 րոպեի ընթացքում խոսեց այն մասին, որ գյուղում ոռոգման ջրի խնդիր չկա։

«Երեկ ու այսօր ամբողջ օրը պոմպակայանն աշխատել ա, սարից ջուրը եկել ա, սպեցիալնի սարից ջուրը անջատել են, որ լարվածություն առաջանա՝ հասկացա՞նք իրար․․ Եվ նաև խմելու համակարգն է՝ սպեցիալնի վինտիլները փակում են, որպեսզի ջուրը չմտնի ցանց, ու լարվածություն առաջանա և իմ անվան հետ խաղան»,-ասաց գյուղապետը։ Իսկ թե ում է հարկավոր այդ լարվածությունը, նա իր պատասխանն ունի՝ նրանց, ովքեր ուզում են իր տեղը զբաղեցնել՝ օգտվելով երկրում փոխված իրավիճակից։

«Ուզում են գյուղապետ դառնան»։

Ընդհանրապես, այս զրույցի ընթացքում գյուղապետը մի քանի անգամ հակասեց ինքն իրեն։ Մասնավորապես, անդրադառնալով գյուղում առկա ներքին խռովություններին, Արթուր Սուվարյանը նշեց, որ այդ ամենը վաղուց հոգնեցրել է իրեն ու նույնիսկ դիմել է նախկին մարզպետ Կարեն Բոթոյանին՝ աշխատանքից ազատվելու իր դիմումն ընդունելու համար։ Սակայն քիչ անց, հարցին, թե արդյո՞ք հարմար առիթ չէ հրաժարվել պաշտոնից, հաշվի առնելով, որ համագյուղացիները պահանջում են իր հրաժարականը՝ նա ծիծաղելով ասաց․ «Մի քանի հոգի են, ոչ թե բոլոր գյուղացիները»։ Իսկ հարցին, թե պատրաստվո՞ւմ է արդյոք գյուղապետն իր թեկնածությունը դնել երկու տարի հետո անցկացվելիք ՏԻՄ ընտրություններում, Արթուր Սուվարյանը դարձյալ ծիծաղելով պատասխանեց, որ այս լարվածությունից ելնելով չի ուզում, բայց կիսատ գործեր ունի և պետք է ավարտին հասցնի։

«Եթե երեկ տենց բաներ չանեին, ես իմ կիսատ գործս պետք է վերջացնեի ու հեռանայի, բայց հիմա էսքան գործ եմ արել, ո՞նց կիսատ թողնեմ, ես առողջապես էլ չեմ կարող, ուղղակի այս մի ծրգիրը պետք է կյանքի կոչեմ»,-ասաց նա։

Անդրադառնալով գյուղապետի հոր և գյուղացու միջև տեղի ունեցած միջադեպին, և հոր կողմից վերջինիս հասված հարվածներին՝ գյուղապետն արդարացավ․ «Նախ, հայրս չի ծեծել, շատ-շատ՝ կարող ա մի հատ, երկու հատ ապտակ ա տվել․․․ բայց դուք ո՞նց եք պատկերացնում, եթե սաբոտաժ ա կազմակերպվում պետության հանդեպ, գյուղի հանդեպ, ի՞նչ պետք ա աներ հայրս»։ Հարցին, թե նա իր դեմ բողոքները որակում է սաբոտա՞ժ, Արթուր Սուվարյանը պատասխանեց՝ միանշանակ, և նաև հավելեց։

«Համայքնի ժողովուրդը դա արդեն գիտի, բացահայտել է, ես էլ ասել եմ՝ համա՛յնք, սա իսկապես մի քանի հոգու սարքած բան ա․․․ եթե Ձեր նկատմամբ մեկը բաներ խոսեր, որ լրիվ բանսարկություն ա, Ձեր հայրը ո՞նց կվարվեր որպես ծնող»,-հարցրեց գյուղապետը։

Դիտարկմանը, որ նա գյուղապետի հայր է և հարցերը ծեծով չեն լուծում, Արթուր Սուվարյանը պատասխանեց․ «Բա բերքն ու բարիքը վառեի՞նք, կարտոշկան թանկանա՞ր, որ գոյւղը մնար սովա՞ծ, մարդկանց եղածը վարի գնար, քաղաքի բնակիչներին էլ վնաս լինե՞ր, կարտոլը դառնար 200-300 դրա՞մ․․․ Հորս փոխարեն ով լիներ՝ կաներ»,-ասաց գյուղապետը։ 

Ինչ վերաբերում է իր անվան հետ կապված ՍՊԸ-ին, ապա նա վստահեցնում է, որ դեռ նախորդ տարի վարչապետին նամակ է գրել խնդրանքով, որ գան, ստուգեն իր ընկերությունը և մեկընդմիշտ վերջակետ դնեն այս հարցին։ Եկել են, ստուգել են և ամեն ինչ նորմալ է այսօր։ Իսկ հարցին, թե արդյո՞ք այսօր, երբ երկրում իրավիճակ է փոխվել, մտավախություն չունի, որ իր ընկերությունում դարձյալ ստուգումներ կլինեն, նա պատասխանեց, որ չի վախենում․․․