Մահացած զինվորին կրակել են վերևից․ ճակատից կրակած փամփուշտը ծոծրակից է դուրս է եկել․ փաստաբան

Արցախում մահացած զինվոր Արթուր Աջամյանի վրա բռնության հետքեր են եղել, որոնք, ըստ դատաբժշկական քննության, կատարվել են տարբեր ժամանակահատվածներում։ Այդ մասին լրագրողների հետ զրույցում ասաց փաստաբան Հայարփի Սարգսյանը։ Նրա խոսքով, Արթուրը մահացու հարվածն ստացել է ճակատի հատվածում։

«Նրան կրակել են վերևից, քանի որ ճակատից կրակած փամփուշտը ծոծրակից է դուրս եկել»,- ասաց փաստաբանը։

Նրա խոսքով` Արթուրին գտել են փոսում, իսկ վիրավոր զինվորին՝ Դավիթին, խրամատում։

«Վիրավոր զինծառայողը հրազենային վնասվածքներ ունի ոտքերի ու դեմքի շրջանում, վիճակը ծանր է»,- ասաց Սարգսյանը։

Նա տեղեկացրեց նաև, որ մահացած զինծառայողը 2-3 ամիս առաջ հարազատներից մեկին պատմել է, որ խնդիրներ կան զորամասում։ Սարգսյանը ասաց նաև, թե Արթուրն իր հարազատներից մեկին ասել է նաև, որ եթե ուզում են մեկին սպանեն, տանում են դիրքեր։

Հիշեցնենք, որ դեկտեմբերի 2-ին՝ ժամը 06:50-ի սահմաններում ՊԲ N զորամասերից մեկի պահպանության տեղամասում մահացու հրազենային վիրավորում էր ստացել ՊԲ զինծառայող, 1998թ. ծնված Արթուր Աջամյանը։ Զինծառայող, 1999թ. ծնված Դավիթ Մելիքբեկյանը վիրավորվել էր։ Ազգային ժողովի մոտ այսօր կեսօրից մահացած զինծառայող Արթուր Աջամյանի հարազատները բողոքի ակցիա էին անում։ Նրանք պնդում էին, որ Արթուրին սպանել են, իսկ տարածված լուրերը, թե ինքնասպան է եղել, չեն համապատասխանում իրականությանը։