Կոկորդին կանգնած...
ԱԺ «Իմ քայլը» խմբակցության ղեկավար Լիլիթ Մակունցը ֆեյսբուքյան իր էջում գրել է, որ «Իմ քայլը» խմբակցությունը որոշել է ՍԴ անդամ Հրայր Թովմասյանի լիազորությունները դադարեցնելու գործընթաց սկսել:
Բնականաբար, իշխող քաղաքական մեծամասնության այս որոշումը պայմանավորված է բացառապես Ռոբերտ Քոչարյանի անձով:
Վաղը դատարանը հրապարակելու է վճիռը՝ Քոչարյանին ազատ արձակել կամ չարձակելու մասին: Ազատ չարձակելու որոշման պարագայում իմքայլականները կարող են խոր շունչ քաշել, իսկ ազատ արձակելու դեպքում՝ հավաքել իրերն ու սպասել վերջնահաշվարկին, քանի որ շաբաթն ուրբաթից շուտ կգա, իսկ քանի որ Նիկոլ Փաշինյանն ամբողջ աշխարհի առաջ խայտառակ է եղել դատարանների մուտքերը շրջափակելու իր ծիծաղելի հայտարարությունից հետո, ուստի այս անգամ, երբ կրկին կենտրոնում Քոչարյանն է, որոշել է գործի գցել իր թևի տակ ծվարած թիմին՝ քայլարածներին ու բոլորի հայացքները կենտրոնացնել դեպի ՍԴ նախագահ Հրայր Թովմասյանը, ով ավելի ուժեղ գտնվեց և տեղի չտվեց փաշինյանական էժանագին շանտաժներին:
Այո՛, Փաշինյանը սովոր է մեկ-երկու օր բողոքի ակցիա հրահրելով՝ հասնել իր նպատակին, սակայն այս «տրյուկը» Թովմասյանի պարագայում չաշխատեց: Ապարդյուն էր նաև Փաշինյանի ընտանեկան պատի թերթում Հրայր Թովմասյանի՝ ԱԺ-ում թույլ տված չարաշահումների մասին գրելը: Ուշադրությո՛ւն, Փաշինյանի կայքը, վստահաբար, նյութը վերնագրել էր Թովմասյանի չարաշահումները, այն պարագայում, երբ այդ չարաշահման մասին չկա դատարանի որոշում:
Ինչևէ, Փաշինյանն անզոր է պայքարել Թովմասյանի դեմ միայնակ իր մեթոդներով, ուստի գործի է գցում իմ քայլականներին, որոնք 2018 թվականի դեկտեմբերից երկրի թիվ մեկ օրենսդիր մարմնում են աշխատում, բայց դեռ չեն հասցրել կարդալ, թե ինչ է սահմանում Սահմանադրությունն ու Սահմանադրական դատարանի մասին օրենքը:
Իսկ ի՞նչ է սահմանում Սահմանադրական դատարանի մասին օրենքը. այդ օրենքում սևով սպիտակի վրա գրված է ՍԴ նախագահի` պաշտոնից ազատման հիմքերը, որոնցից որևէ մեկով Հրայր Թովմասյանին այս քաղաքական մեծամասնությունը անվստահություն հայտնել չի կարող: Ո՛չ Սահմանադրությունը, ո՛չ էլ որևէ օրենք Ազգային ժողովին չի տալիս ՍԴ նախագահի պաշտոնանկության գործընթաց նախաձեռնելու իրավասություն:
Թե ինչ հնարանքներ են օգտագործելու Ազգային ժողովի իմքայլական պատգամավորներն իրենց բերանից դուրս եկածն իրականացնելու համար, անհայտ է։
Հավանաբար, Թովմասյանին անվստահություն հայտնելն էլ կդասվի չստացված վեթինգի, անցումային արդարադատության, Ստամբուլյան կոնվեցիայի շարքին:
Իսկ այսօր պետք է «շախ տալ» կնքահորն ու պատմել «լո-լո»-ներ, ինչն էլ անում են «Իմ քայլում»։