Եթե Ծառուկյանին պատկանող հանքերը ժողովրդի համար վտանգ ներկայացնեն` նա կփակի դրանք (տեսանյութ)

Եթե ժողովուրդն այնտեղ ապրում է, ապրելու է, ապա ո՞նց կարելի է ժողովրդին հաշվի չառնել։  Այսօր ԱԺ-ում լրագրողների հետ զրույցում ասաց ԱԺ ԲՀԿ խմբակցության ղեկավար Գագիկ Ծառուկյանը՝ անդրադառնալով Ամուլսարի հանքի շահագործմանը։

Ծառուկյանի դիտարկմամբ՝ իշխանությունն այսօր կանգնած է լուրջ փաստի առաջ և քննարկումներ է նախաձեռնել: Ըստ ԲՀԿ ղեկավարի՝ իշխանությունը չի ուզում ո'չ ժողովրդին նեղացնել, ո'չ էլ շահագործողին:

«Լիարժեք ուսումնասիրություն պետք է իրականացվի, ժողովրդին ներկայացվի, որ ընդհանուր հայտարարի գան»,- շարունակեց Գագիկ Ծառուկյանը։

Գագիկ Ծառուկյանը ևս առնչվում է հանքարդյունաբերության ոլորտի հետ` Արարատի ցեմենտի գործարանը և Մղարթի գործարանը, սակայն, նրա խոսքով, եթե ժողովուրդը հարց բարձրացնի և դեմ լինի` ինքը ժողովրդի կարծիքի հետ հաշվի կնստի:

«Դուք դրանում չկասկածեք․․․ չի աշխատի։ Եթե դա ժողովրդին խանգարում ա, իմ կառավարիչները չեն կարողանում ժողովրդին բացատրեն, ներկայացնեն, կամ մեր Մղարթի ոսկու հանքն արդեն 7 տարի՝ չի աշխատում, ուսումնասիրվում է։ Եվ մեր մոտ ցիանիդ չի օգտագործվում: Ցիանիդը թունավոր է: Մեզ մոտ մի հատ ջրով լվացման պրոցես ա կատարվում»,- ընդգծեց Գագիկ Ծառուկյանը։

Անդրադառնալով տնտեսական հեղափոխության հարցին, Գագիկ Ծառուկյանը կրկնեց իր այն միտքը, որ կառավարության ներկայացրած ծրագիրը տնտեսական հեղափոխություն չի ենթադրում:

«Վարչապետն ուզում է գործ անել, բայց միայն ասելով չէ, պետք է աջակցել այդ մարդուն»,-ասաց Ծառուկյանը և հավելեց. «Թե չէ՝ ինձ հետ քայլել է, ինձ հետ եկել է, ինչ անենք: Իր ցավն էլ տանեմ, բայց, բոլորի նպատակը երկիրը զարգացնելն է, հզորացնելն ու ժողովրդի կյանքում փոփոխություն մտցնելն է»: