Գագիկ Խաչատրյանի փաստաբանը կալանավորման հիմքեր չի տեսնում. որոշումը կբողոքարկվի
Գագիկ Խաչատրյանի կալանավորման որոշումն ապօրինի է: Այդ մասին լրագրողների հետ զրույցում հայտարարեց Ֆինանսների նախկին նախարար, ՊԵԿ նախկին նախագահ Գագիկ Խաչատրյանի փաստաբան Երեմ Սարգսյանը` դատարանի որոշման հրապարակումից հետո:
Նա նկատեց, որ կալանավորման համար հիմնավորումներ չկան:
«Գործի նյութերում հիմնավորումներ չկան, որոնք մեր հակափաստարկները կարող էին չեզոքացնել։ Մինաշանակ կբողոքարկեմ կալանավորման որոշումը։ Վերջերս մենք հույս ունեինք, որ դատարաններն ավելի օբյեկտիվ են ու արդար։ Բայց ստացվեց, որ երեք օրվա քննությունը ձևական է, նշանակություն չուներ, թե կողմերը ինչ փաստեր էին ներկայացնում, ինչ առարկություններ էին հնչում»,-ասաց Երեմ Սարգսյանը։
Փաստաբանը նաև հիշեցրեց, որ քրեական գործ հարուցվելուց հետո վեց ամսվա ընթացքում ազատության մեջ գտնվող Գագիկ Խաչատրյանը ոչ պատշաճ վարքագիծ չի դրսևորել, քննությանը չի խոչընդոտել։ Ավելին, փաստաբանի խոսքով` խաչատրյանի բնակարանում տեղի ունեցած խուզարկության օրը նա ինքնակամ Երևանից մեկնել է Ծաղկաձոր և ներկա եղել գործընթացին:
«Մեր առարկությունների ժամանակ, խնդրեցինք մի քանի անգամ, եթե բավարարելու է ԱԱԾ-ի միջնորդությունը՝ հիմքերին անդրադառնան, հակառակ դեպքում դա կլինի չպատճառաբանված ու անօրինական որոշում։ Ես թերթեցի որոշումը, տեսա, մեր կողմից բերված որևէ փաստարկի անդրադարձ չի եղել։ Բայց դատարանը կայացրեց այն որոշումը, որը կայացրեց»,-ասաց փաստաբանը։
Հիշեցնենք, որ Ֆինանսների նախկին նախարար, ՊԵԿ նախկին նախագահ Գագիկ Խաչատրյանը, նրա եղբոր որդին՝ Կարեն Խաչատրյանը երեկ դատարանի որոշմամբ կալանավորվել են։ Միջնորդությունը դատարան ներկայացրել էր ԱԱԾ-ն՝ ծառայությունում հարուցված քրեական գործի շրջանակում։