Ղարաբաղի մասով Պուտինն ու Մակրոնն իրենց «ժամացույցնե՞րն են ուղղել»
«Մեծ Յոթնյակի» գագաթնաժողովի, կարելի է ասել, նախաշեմին, Ռուսաստանի և Ֆրանսիայի նախագահները հանդիպել են և քննարկել բազմաթիվ հարցեր, որոնց շարքում նաև անդրադարձ են կատարել Ղարաբաղյան կարգավորման թեմային։ Ըստ Կրեմլի խոսնակ Դմիտրի Պեսկովի հայտարարության՝ երկու նախագահները բավական հագեցած օրակարգով են նստել բանակցությունների։ Կոնկրետ Ղարաբաղի մասով այլ մանրամասն հայտնի չէ։
«Վլադիմիր Պուտինն ու Էմանուել Մակրոնը մտքեր են փոխանակել Սիրիայում իրավիճակի մասին՝ անդրադառնալով թե՛ սահմանադրական կոմիտեի ձևավորմանը, թե՛ կարգավորման հեռանկարներին, թե՛ փախստականների վերադարձին: Անդրադարձ է կատարվել նաև բազմաթիվ այլ տարածաշրջանային խնդիրների՝ Բալկաններ, Ղարաբաղ, զրուցել են նաև կլիմայի մասին: Ընդհանուր առմամբ, բանակցությունները դրական են եղել»,- ասված է Կրեմլի խոսնակի հայտարարության մեջ։
Դժվար է ասել, թե ինչ են խոսել կամ ինչ-որ բան պայմանավորվե՞լ են, թե՞ ոչ։ Ամեն դեպքում ուշագրավ է, որ այդ քննարկումից շաբաթներ առաջ էլ Հայաստան էր եկել Ռուսաստանի Անվտանգության խորհրդի քարտուղար Նիկոլայ Պատրուշևը։ Արդեն հաշված օրեր անց թևակոխում ենք աշուն, և սովորաբար քաղաքականությունն ու դիվանագիտությունը սկսում են ակտիվանալ գլոբալ առումով հենց աշնան մեկնարկով։
Հասկանալի է, որ որոշակի քայլեր են լինելու նաև Ղարաբաղյան կարգավորման գործընթացի հետ կապված։ Գուցե այդ քննարկման ընթացքում պարզապես «ուղղել են ժամացույցները» դիվանագիտական-քաղաքական և այլ պրոցեսներից առաջ, որոնք տեղի են ունենալու Ղարաբաղյան ճակատում։ Դժվար է ասել։ Սակայն անկախ այն հանգամանքից, որ Փաշինյանը սկսել է Ղարաբաղյան հակամարտության մասին հայտարարություններ անել զուտ միայն ներքին սպառման լսարանին հաճոյանալու համար, պաշտոնական Երևանի և Բաքվի մոտեցումները սկսել են չափազանց տարամիտել, ինչը կարգավորման հնարավորությունն ավելի է նվազեցնում։