Իշխանությունդ պահելու համար տանկից բացի Իսկանդեր էլ կհանես ժողովրդի դեմ, Նիկո՛լ
Վարչապետ Նիկոլ Փաշինյանն իր սիրելի լրատվամիջոցին հարցազրույց տալիս ժողովրդի ականջին կաթեցրեց մի բան, ինչի ականտեսը կլինենք շուտով։
Փաշինյանն իր վերջին հարցազրույցով հող նախապատրաստեց այն ամենի համար, ինչին պատրաստվում է դիմել իր աթոռն ամուր պահելու համար։
Թեև նրա՝ բնության գրկում տված հարցազրույցի այս փոքրիկ դրվագը շատերի ուշադրությունից դուրս մնաց, բայց ակնհայտ է, որ իրեն բնորոշ տոնայնությամբ Փաշինյանը հասկացրեց՝ եթե Քոչարյանը քաղբանտարկյալ է, ուրեմն ինքն իրավունք ունի ՀՀ զինված ուժերը, տանկերը մտցնել քաղաք, և ցանկացած ընդդիմադիր դրսևորում տանկերի թրթուրների տակ ճզմել:
Որպես ուժեղ հոտառություն ունեցող ընդդիմադիր գործիչ, և ոչ երբեք պետության գլուխ կամ ղեկավար, Փաշինյանը զգում է իր մոտալուտ պարտությունը: Պարտություն, որին նա կհասնի իր թիմի անգրագիտության ու դատարկության պատճառով։
Փաշինյանը զգում է՝ իրեն սպառնում է սառը բանտախցում հայտնվելու վտանգը՝ սահմանադրական կարգի տապալման մեղադրանքով, իսկ այնտեղ ոտք չդնելու համար ինքը պետք է ժողովրդին պատրաստի նոր զարգացումների, սրացումների, ուստի թավշյա հեղափոխության մասնակիցների ականջին պետք է կաթեցնի, որ ստիպված է հրեշից պաշտպանվելու համար գործի գցել տանկերը։
Այո՛, եսասիրության գագաթնակետում ու իշխանական փառքից կուրացած, սեփական երկրում օր օրի ձնագնդիի նման մեծացող դժգոհության ալիքը չնկատող Նիկոլ Փաշինյանն իշխանությունը պահելու համար ոչ միայն տանկեր, այլ նույնիսկ Իսկանդեր կարող է հանել սեփական ժողովրդի դեմ՝ հերոս ու հակահերոս ֆիլմի հերթական սերիան ունենալու համար։
Բայց արդյո՞ք սեփական ժողովրդին տանկով ու Իսկանդերով սարսափի մեջ պահելու համար նրա հետ քայլեց մի ողջ ժողովուրդ:
Արդյո՞ք Փաշինյանն իր տապալման վերջում իշխանությունը կթողնի այնպես, ինչպես օրինակ՝ Սերժ Սարգսյանը՝ լուռ, ընդամենը մեկ հայտարարությամբ, թե՞ մենք ականատես ենք լինելու Փաշինյան-Քոչարյան-դաշնակցականներ-Հանրապետական նոր մենամարտին՝ դարձյալ մեկ բանի համար՝ հանուն իշխանության:
Արդյո՞ք թավշյա հեղափոխությունն իր տեղը կզիջի արյան հեղափոխությանը։
Սրանք հարցեր են, որոնց մասին պետք է ժողովուրդը մտածի երկար, մտածի ու վերլուծի՝ նախքան տանկերի թրթուրների դիմաց կանգնելը։
Մտածելու մեկ առիթ ևս՝ երեկ կառավարության նիստի ժամանակ Փաշինյանը հրահանգեց ոստիկանությանն ու իրավապահ մյուս կառույցներին՝ թույլ չտալ որևէ մեկին շանտաժի լեզվով խոսել կառավարության հետ։
Իսկ գուցե տանկերի թրթուրների տակ առաջինը հայտնվեն նրանք, ովքեր իր նման իշխանության գալու համար կտրվեն շանտաժին, պոպուլիզմին ու փողոցի՞ն։
NEWSPRESS.am-ի հիմնադիր տնօրեն՝
Արմենուհի (Արիանա) Հովսեփյան