«Ապարանի ոստիկանապետը կլյաուզնիկ է ու գործ սարքող, որդին էլ կեղծիքով ազատվել է բանակից». ապարանցիները դժգոհում են
Դեռ մեկ տարի առաջ, կառավարության նիստի ժամանակ վարչապետ Նիկոլ Փաշինյանը հանձնարարել էր ստուգել նախկին ու ներկա բարձրաստիճան պաշտոնյաների որդիների զինծառայությունից ազատման հիմքերի օրինականությունը:
Ոստիկանության կողմից ձեռնարկված միջոցառումների արդյունքում ձեռք բերված և զինվորական դատախազությանը տրամադրված տվյալների հիման վրա քրեական գործ հարուցելու օրինական առիթի և բավարար հիմքերի առկայությամբ հարուցվել են 6 քրեական գործ:
Քննչական կոմիտեից ստացված տեղեկատվության համաձայն էլ քրեական գործ է հարուցվել նաև Ոստիկանության Արագածոտնի մարզային վարչության Ապարանի բաժնի պետ Աշոտ Հայրապետյանի որդու` Արամ Հայրապետյանի և նրա եղբորորդու` Հ. Հայրապետյանի նկատմամբ:
Ըստ ստացված տվյալների` երիտասարդները զինծառայությունից ազատվել են փաստաթուղթ կեղծելու միջոցով:
Աշոտ Հայրապետյանի որդին` Արամը, բանակից ազատվել է հիվանդության պատճառով, սակայն NEWSPRESS.am-ի աղբյուրների համաձայն` երիտասարդը առողջական խնդիրներ չունի:
Սակայն սա միակ օրինախախտումը չէ, որն իրականացվել է երիտասարդի ոստիկանապետ հոր թողտվությամբ: Մեր աղբյուրների փոխանցմամբ, Արամ Հայրապետյանն ունի սեփական` Lexus ավտոմեքենա, սակայն այն վարելու փոխարեն, հանգիստ մաշում է հոր ծառայողական մեքենան` աչքի ընկնելով լկտի պահվածքով:
Սակայն դարձյալ սա ամենը չէ:
2018 թվականին ԱԱԾ-ի կողմից ձերբակալվեցին մի շարք անձիք, ովքեր զբաղվում էին Ապարանի սև հողերի անօրինական վաճառքով: Նախաքննությամբ պարզվել է, որ այս մադիկ, այսպես ասած, առք ու վաճառքից «նալոգներ» են տվել Աշոտ Հայրապետյանին, ով իր հերթին այդ գումարից բաժին է հանել Արագածոտնի մարզի ոստիկանության վարչության պետ Լևոն Յազիչյանին:
Չնայած այս ամենին, հիշյալ պաշտոնյաները դեռևս առոք-փառոք իրենց աթոռներին են ու հանգիստ շարունակում են պաշտոնավարել:
Խոսվում է նաև Աշոտ Հայրապետյանի կողմից իրականացվող դիրքի չարաշահման ու կոռուպցիոն մի երևույթի մասին ևս:
Արագածոտնի մարզպետարանի մեր հավաստի աղբյուրի փոխանցմամբ, Ապարանի ոստիկանապետ Հայրապետյանը մարզի համայնքապետերից պարբերաբար գառ է պահանջում` ուտել-խմելու և «քեֆ քաշելու» համար: Մեր աղբյուրները փոխանցում են, որ գյուղապետերն ստիպված ձայն չեն հանում. վախենում են, քանի որ տեսնում են ոստիկանապետի ամենթողությունը և վստահ են, որ նրան մերժելու դեպքում, վերջինս «գործ կսարքի» իրենց գլխին:
NEWSPRESS.am-ը խոսել է նաև մի քանի ապարանցիների հետ: Վերջիններս նախ կասկածամտորեն մոտեցան մեր հարցերին, ապա խնդրելով չհրապարակել իրենց անունները` ասացին, որ Աշոտ Հայրապետյանը «սրբություն» չունի:
Մեզ զրուցակիցներից մեկն ասաց. «Այ բալա, ի՞նչ գործ ունես էդ կլյաուզնիկի հետ: Սաղի վրայով կանցնի, մարդկանց գլխին կսարքի, մենակ թե իր համար լավ լինի: Կաշառակերի մեկն ա»:
Մեր մյուս զրուցակցին էլ զարմացրեց այն, թե ինչու է մինչ օրս, երբ արդեն նոր իշխանություն է եկել, Աշոտ Հայրապետյանը շարունակում պաշտոնավարել:
Տեղեկություններ կան նաև, որ Աշոտ Հայրապետյանն իր պաշտոնավարման ամբողջ ընթացքում ձեռք է բերել տարածքներ և դրանք գրանցել կնոջ և իր որդու անունով:
Իսկ նրա ունեցվածքի մասին հրապարակումը` խոստանում ենք հաջորդիվ: