Արցախի հետ երկխոսության անհրաժեշտություն առաջացավ Վաշինգտոնի հանդիպումից հետո․ Մնացականյանը հանդիպել է Բակո Սահակյանի հետ (տեսանյութ)
Մեր կողմից արտահայտված կարևորագույն նպատակներից մեկն է՝ ապահովել Արցախի իշխանությունների խորքային զգացումը և ներգրավվածությունը Լեռնային Ղարաբաղի հակամարտության խաղաղ կարգավորման գործընթացում: Այս մասին Արցախի նախագահ Բակո Սահակյանի հետ 3 ժամ տևած հանդիպումից հետո, լրագրողների հետ զրույցում ասաց ՀՀ ԱԳ նախարար Զահրաբ Մնացականյանը։
Կարևորելով այդ գործառույթը՝ նա նկատեց, որ հարցը վերաբերում է Արցախի բնակչության անվտանգությանը։
«Արցախը քաղաքական միավոր է, որն ունի բնակչության կողմից ընտրված իր իշխանությունները և իր խորագույն պատասխանատվությունն այս հարցում: Ե՛վ բանակցային գործընթացի, և՛ խաղաղ կարգավորման գործընթացի կոնտեքստում այդ սեփականության զգացումի ամրապնդումը բոլորիս համար չափազանց կարևոր հարց է, և այդ համատեքստում է, որ ձևավորվում է իմ այսօրվա այցի նպատակը»,- ասաց նախարարը։
Նա նկատեց, որ Արցախի իշխանության հետ երկխոսության անհրաժեշտություն առաջացավ հատկապես Վաշինգտոնում տեղի ունեցած հանդիպումից հետո։ Այդ համատեքստում հանդիպումներ կլինեն նաև Արցախի արտգործնախարարի հետ։
ՀՀ արտգործնախարարի դիտարկմամբ հանդիպումներն ու քննարկումներն անհրաժեշտ են, որպեսզի նախապատրաստեն աշխատել խաղաղ կարգավորման ուղղությամբ:
«Ես ցանկանում եմ ևս մեկ անգամ առանձնահատուկ շեշտել՝ Լեռնային Ղարաբաղի հիմնահարցը մեզ համար եղել և մնում է մեկ կարևորագույն գերխնդիր՝ Արցախի բնակչության Էքզիստենցիալ անվտանգությունը, որից բխում է Արցախի կարգավիճակի հարցը։ Արցախում բնակվող 150 հազար մեր հայրենակիցներն այսօր հանդիսանում են մեր ողջ հայության ինքնության պահապանը` հաշվի առնելով այդ էքզիստենցիալ վտանգը։ Որևէ հայ աշխարհի ցանկացած կետում չի կարող խուսափել այն խորագույն վնասից, ինքնությանը հասցված վնասից, եթե մենք ունենանք Արցախում բնակվող մեր հայրենակիցների էքզիեստենցիալ անվտանգության որևէ վտանգ»,-ասաց նախարարը։
Անդրադառնալով Դավիթ Բաբայանի հայտարարությանը, թե․ «Շնորհակալ ենք Երևանին, որ տեղեկացնում է մանրամասների մասին, բայց տեղեկացնելը քաղաքական և իրավական կատեգորիա չէ», Զոհրաբ Մնացականյանը նկատեց, որ դեռևս ՀՀ իշխանության օրակագրում է այն հարցը, որ Ղարաբաղը պետք է ունենա լիարժեք ներգրավվածություն։
«Եթե հարցը հեշտ լիներ, վաղուց լուծված կլիներ: Սա օրակարգային հարց է, որը կանոնավոր, հետևողականորեն հետապնդվում է, որովհետև մենք ունենք գերակա խնդիր. սա պրակտիկ խնդիր է, սա պրագմատիկ մոտեցում է։ Եթե մենք լիարժեք և արդյունավետ բանակցային, խաղաղ կարգավորման գործընթացի մասին ենք խոսում և մտածում՝ հաշվի չառնել այս կարևորագույն գործոնը, որը վերաբերում է Լեռնային Ղարաբաղի ներգրավվածությանը և այս գործընթացում սեփականության զգացումի ամրապնդմանը, պրակտիկ առումով մենք վնաս ենք հասցնում խաղաղ կարգավորման գործընթացի արդյունավետ աշխատանքին»,-ասաց Մնացականյանը։
Մանրամասները՝ տեսանյութում