Փաշինյանի արցախյան տեսլականը ի հայտ եկավ Վաշինգտոնում. Վահան Բաբայան
Մենք բռնում ենք Արցախը կորցնելու ուղին: Այդ մասին ֆեյսբուքյան իր էջում գրել է «Ռեֆորմիստների կուսակցության» ղեկավար Վահան Բաբայանը՝ անդրադառնալով Վաշինգտոնում տեղի ունեցած հանդիպմանն ու դրան հետևած Մինսկի խմբի հայտարարությանը:
Վահան Բաբայանը մասնավորապես գրել է.
«Փաշինյանի արցախյան տեսլականը ի հայտ եկավ Վաշինգտոնում:
Մինչ բոլորը քննարկում են ՍԴ ուզուրպացիան, Մամեդյարովը խոսում է Արցախից զորքերի դուրս բերման, խաղաղապահ ուժերի տեղակայման և Արցախի խնդրի փուլային լուծման մասին: Եվ խոսում է նրա մասին, որ դա համանախագահների առաջարկն է:
Հիմա մեր ԱԳՆ-ն, եթե գոյություն ունի, պետք է պատասխանի հետևյալ հարցերին:
Այդ ի՞նչ զորքերի դուրս բերման մասին է խոսում Մամեդյարովը Վաշինգտոնի հանդիպումից հետո:
Ի՞նչ խաղաղապահների մասին է խոսքը և համաձայն է արդյոք Հայաստանը փուլային լուծման տարբերակին, որը մերժվել էր Լևոն Տեր-Պետրոսյանի հեռանալուց հետո 1998 թվականին:
Եթե ԱԳՆ ի զորու չէ պատասխանել՝ մնում է Փաշինյանը պարզաբանում տա հասարակությանը՝ այդ ի՞նչ պայմանավորվածություններ են ձեռք բերվել Վաշինգտոնում և ի՞նչ է բարբաջում Մամեդյարովը:
Հիմա եթե համանախագահները նման առաջարկ են բերել, ինչի մասին գրում է միջազգային մամուլը, ստացվում է թավշյա կառավարությունը պետք է հստակ դիրքորոշում հայտնի հայ ժողովրդի առաջ այս սենսացիոն տեղեկության վերաբերյալ, հակառակ դեպքում մենք բռնում ենք Արցախը կորցնելու ուղին»:
Հիշեցնենք, որ Վաշինգտոնում ԵԱՀԿ Մինսկի խմբի համանախագահներ Իգոր Պոպովի (Ռուսաստան), Ստեֆան Վիսկոնտիի (Ֆրանսիա), Էնդրյու Շոֆերի (ԱՄՆ) և ԵԱՀԿ գործող նախագահի անձնական ներկայացուցիչ Անջեյ Կասպրչիկի մասնակցությամբ տեղի է ունեցել Հայաստանի և Ադրբեջանի ԱԳ նախարարներ Զոհրաբ Մնացականյանի և Էլմար Մամեդյարովի հանդիպում։