Ինչ է թաքնված Փաշինյանին Բալասանյանի հրաժարականի հետ կապելու լուրերի տակ
Այսօր Վիտալի Բալասանյանն ազատվեց Արցախի Հանրապետության անվտանգության խորհրդի քարտուղարի պաշտոնից։
Այս տեղեկաստվության պաշտոնական հրապարակումից առաջ արդեն իսկ շրջանառվում էին լուրեր, որ Բալասանյանը հեռանալու է․ սակայն այս հեռացման հիմքում դրվում էր Նիկոլ Փաշինյանի գործոնը։
Ըստ դաշտ նետված լուրերի՝ Փաշինյանի ազդեցությունն արդեն հասել է Արցախ, նա է Բակո Սահակյանի առաջ պայմաններ դրել, հրահանգել վարվել այս կամ այն կերպ։
Արցախի վերին էշելոններում տեղի ունեցած ցանկացած կադրային փոփոխություն միտումնավոր կերպով կապվում է ՀՀ վարչապետի հետ՝ նրա ազդեցությունն ուռճացնելու և միֆ ստեղծելու համար։
Հասարակությանը փորձ է արվում ցույց տալ, որ Փաշինյանը ոչ միայն իր դիրքերն ամրապնդել ու խոր արմատներ է գցել Հայաստանում, այլ նաև նույնն է արել Արցախում։
Այս տրամադրությունները Հայաստանում ստեղծվում են Փաշինյանի ու նրա թիմի՝ ամեն օր գրանցող վարկանիշի անկմանը զուգընթաց։ Կառավարության ղեկավարի համար այլևս պետություն կառավարելը դարձել է անվերահսկելի մի գործ, որի բեռի տակից այդպես էլ չի կարողանում դուրս գալ, ինչի հետևանքով էլ վերջին շրջանում հաճախակիացել են նրա ջղաձգումները, որոնք արդեն ոչ միայն արձանագրվում իշխանական կուլիսներում, այլ նաև ՀՀ Կառավարության նիստերի ընթացքում։
Խորքում, սակայն, Փաշինյանը կորցրել է վերահսկողությունը Հայաստանում, հետևապես, անիմաստ է խոսել այդ վերահսկողության մասին՝ Արցախում։
Արցախում 2020 թվականին տեղի են ունենալու նախագահական ընտրություններ, և ինչպես բոլոր պետություններում՝ Արցախում ևս քաղաքական վերադասավորումներ են ընթանում։
Միայն այս վերջին շրջանում մի շարք պաշտոնյաներ հեռացան իրենց պաշտոններից՝ Արայիկ Հարությունյան, Արթուր Աղաբեկյան, նրանց շարքը կհամալրեն այլ պաշտոնյաներ ևս․ իսկ պատճառը մեկն է՝ պատրաստվել նախագահական ընտրությունների, ձևավորել թիմեր ու գնալ ընտրապայքարի։ Այնպես որ, պետք չէ Բալասանյանի հրաժարականը կապել Փաշինյանի հետ՝ նրան այդ հարցում ինչ-ինչ դերակատարում վերագրելով։
Պետք չէ Փաշինյանից բոլորին վերահսկող մարդու կերպար ստեղծել․ չէ՞ որ նա անգամ իր աճեցրած ու պետական կառավարման ապարատը հեղեղած անորակ կադրերի վերահսկողությունն է վաղուց ձեռքից բաց թողել, էլ ուր մնաց՝ գնա-հասնի Արցախ ու այդ գործն անի այնտեղ։
NEWSPRESS.am