Ինչու Պուտինն ու Ալիևը չեն խոսել ղարաբաղյան կարգավորումից
Ռուսաստանի նախագահ Վլադիմիր Պուտինը օրեր առաջ հեռախոսազրույց է ունեցել Ադրբեջանի նապագահ Իլհամ Ալիևի հետ։ Այս մասին հաղորդագրություն էր տարածել Կրեմլի մամուլի ծառայությունը։ Ըստ հեռախոսազրույցի մասին հրապարակված պաշտոնական տեղեկատվության, Պուտինն ու Ալիևը քննարկել են ռուս-ադրբեջանական գործակցությանը և սպասվող պայմանագրերին առնչվող հարցեր։
Հետաքրքրական է այն, որ հեռախոսազրույցը տեղի է ունեցել ադրբեջանական կողմի նախաձեռնությամբ։ Բաքուն էլ իր տարածած հայտարարության մեջ ժլատություն չի արել ընդգծելու համար ռուս-ադրբեջանական հարաբերությունների բարձր մակարդակը, շեշտելով այն հանգամանքը, որ Ռուսաստանում Սուրգուտ քաղաքի օդանավակայանն անվանվել է ադրբեջանցի երկրաբան Ֆարման Սալմանովի անունով, ով եղել է Սիբիրում նավթի պաշարների հայտնաբերման գլխավոր մասնագետներից մեկը։
Ըստ Բաքվի վարկածի, Ալիևը երախտագիտություն է հայտնել այս առնչությամբ։ Ուշագրավ է այն, որ Ռուսաստանի նախագահը միայն Սուրգուտի օդանավակայանը չի անվանակոչել, այլ, ընդհանուր առմամբ, 40 օդանավակայան է անվանակոչվել, ընդ որում, Սիմֆերոպոլի օդանավակայանն էլ՝ Հովհաննես Այվազովսկու անունով։ Զարմանալի է, սակայն Երևանից այս դրվագին առհասարակ անդրադարձ չեղավ, իսկ Բաքվի կեցվածքի մոտիվացիան հասկանալի է։
Նուրսուլթանյան դեպքերի ֆոնին Ալիևը ցանկանում է ցույց տալ, որ ցանկացած հարցով կարող է շփվել Պուտինի հետ, այն դեպքում, երբ Ուկրաինայի նորընտիր նախագահ Վլադիմիր Զելենսկուն Պուտինի հետ շփվելու «վարպետության դաս» տվող Փաշինյանը ոչ մի կերպ չի կարողանում հարաբերությունները նորմալացնել Կրեմլի ու Պուտինի հետ։
Ուշագրավ է նաև այն, որ ղարաբաղյան կարգավորման հարցով որևէ քննարկման մասին հիշատակում չկա։ Սա այն դեպքում, երբ հակամարտության գոտում իրադրությունը նախ սրվեց բավականին, ապա նաև՝ Բաքուն էապես կոշտացրեց իր դիրքորոշումը, թեև երբեք էլ Բաքուն մեղմ կեցվածք չի ունեցել, եթե անկեղծ արձանագրում կատարենք։
Տպավորություն է, որ իրադրության սրացումը Ղարաբաղում Մոսկվային այս պահին, գոնե ցուցադրական մակարդակում, չի հետաքրքրում, հանգամանք, որը շահեկան դիրքերում է պահում Բաքվին և տհաճ իրավիճակ ստեղծում Երևանի համար։ Այս ամենը Երևանի համար պետք է որ անհանգստանալու առիթ լիներ, մինչդեռ Փաշինյանի իշխանությունը զբաղված է երկրորդական հարցերով։
NEWSPRESS.am