Վանեցյանը՝ Մարտի 1-ի գործով ոստիկանության ձերբակալված պաշտոնյայի և ԱԱԾ-ից անհետացած նյութերի մասին
Քրեական գործը գտնվում է ՀՔԾ վարույթում։ ՀՔԾ-ն երեկ տարածել է համապատասխան հաղորդագրություն, որից առավել բան ես ասել չեմ կարող։ Այդ մասին այսօր լրագրողների հետ զրույցում ասաց ԱԱԾ տնօրեն Արթուր Վանեցյանը՝ անդրադառնալով ՀՀ ոստիկանության զորքերի հրամանատարի տեղակալի՝ շտաբի պետի պաշտոնը զբաղեցրած Գեղամ Պետրոսյանի ձերբակալությանը։
«Հավաստիացնում եմ ձեզ, որ Հատուկ քննչական ծառայությունը և նաև Ազգային անվտանգության ծառայության օպերատիվ մարմինները, միմյանց հետ համագործակցելով, իրականացնում են ամեն ինչ, որպեսզի բացահայտեն Մարտի 1-ի գործն ամբողջությամբ»։
Հարցին, թե եղած ինֆորմացիոն բազան թույլ տալի՞ս է ենթադրելու, որ Մարտի 1-ի սպանությունների գործով ձերբակալությունները կշարունակվեն, Վանեցյանը պատասխանեց․ «Ես կանխատեսումներով չեմ կարող զբաղվել, կլինեն փաստեր, կլինեն բացահատումներ՝ դրա մասին կտեղեկացվի»։
Ինչ վերաբերում է ԱԱԾ-ից անհետացած նյութերին, ապա այդ փաստի առթիվ քրեական գործ չի հարուցվել, որովհետև դա յուրահատկություններ պարունակող գործ է, որը պետք է ամբողջությամբ բացահայտվի։
«Որպեսզի որևէ կասկած որևէ մեկի մոտ չմնա, որ մենք փորձել ենք կոծկել այդ փաստաթղթերի անհետացումը կամ այդ փաստաթղթերի հետ կապված՝ ինչ-ինչ գործեր չեն բացահայտվի։ Ուղղակի շատ մեծ ծավալի աշխատանք է տարվում Ազգային անվտանգության տեսչական և ներքին անվտանգության վարչության կողմից, բայց կարծում եմ՝ առաջիկայում կավարտվի և կփոխանցվի քննչական մարմին, գլխավոր դատախազը կորոշի, և քննչական մարմինը հետագայում պարզաբանումներ կտա»,- նշեց Վանեցյանը։