Դասալիքները Ապրիլյան պատերազմի հանգամանքները կքննեն ու կկայանան արյան վրա
Սերմացու գողացող մկներին բռնելու շոուների բեմադրություններից արդեն ձանձրացած և Մարտի մեկի ողբերգության բացահայտման ֆոնին քաղաքական դիվիդենտներ հավաքող իշխանությունն այժմ որոշել է ժողովրդին սոցիալական խնդիրներից շեղելու այլ տարբերակ գտնել:
Աշխատավարձ բարձրացնելու, արտագաղթ ճանապարհը փակելու և հայաստանցիներին արժանապատիվ կյանքով ապահովելու փոխարեն իշխանությունը որոշել է հասարակության վերքի վրա աղ լցնել ու Ապրիլյան պատերազմի հանգամանքները բացահայտել:
2016 թվականի այդ պատերազմի համար աշխատանքից ազատված պաշտոնյային սեփական խորհրդականը դարձրած Նիկոլ Փաշինյանի կոճակ սեղմողներն այսօր ապահովել են Ազգային ժողովում 2016 թվականի ռազմական գործողությունների հանգամանքները քննող քննիչ հանձնաժողովի ստեղծման համար անհրաժեշտ պայմանները:
47 պատգամավոր իր ստորագրությունն է դրել այդ հանձնաժողովի ստեղծման վերաբերյալ փաստաթղթի տակ և արդյունքում բանակում չծառայած դասալիքները, որոնք տարբեր եղանակներով չեն տվել իրենց պարտքը հայրենիքին, ովքեր ունեն զրոյական գիտելիք բանակի, պատերազմի և դրա հանգամանքների մասին, այսօր դառնալու են պատերազմի հանգամանք քննողներ:
Իհարկե, այս անփորձներին մեղադրել չես կարող, քանի որ գաղափարի հեղինակը այս պատգամավորների բոլոր գաղափարների հեղինակ մեծն Նիկոլ Փաշինյանն է, ով ևս չի ծառայել բանակում, զինվորական համազգեստ կյանքի մեջ հագել է մեկ-երկու անգամ ապրիլյան պատերազմի օրերին դիրքեր բարձրանալով՝ այն էլ ոչ թե զինվորին օգնելու, այլ պարզապես այդ մասին Ֆեյսբուքին իմաց տալու և սելֆիներ անելու համար:
Իհարկե, եթե Տիգրան Ավինյանի նման դասալիքը գնում և Ավինյանի ապրած օրերի չափ առաջնագիծ պահած մարդկանց զինվորականության մասին դասախոսություն է տալիս, չի բացառվում, որ բանակից գաղափար չունեցողներն էլ հիմա պատերազմի հանգամանքներ քննեն:
Բայց որքանո՞վ է դա արդար, որքանո՞վ է դա ազնիվ, չէ՞ որ արյան վրա կայանալը, նվազագույնը, անբարոյականություն է: Արդեն պատկերացնում ենք, թե ԱԺ «Իմ քայլը» խմբակցության պատգամավորներն ինչպես են ինքնահաստատվելու այս քննիչ հանձաժողովիաշխատանքների ընթացքում, աջ ու ձախ լրագչողներին շռայլելու իրենց բացահայտումները: Փաշինյանը ստեղծել է կայացման հարթակ օգտակար գործողության գործակցից զուրկ այս խաժամուժի համար, ուստի ևս մեկ անգամ հորդորում ենք՝ կայացեք, բայց ո՛չ արյան վրա:
NEWSPRESS.am