Մեր թիմը Ջիվան Աբրահամյանի ու նրա կազմակերպած հանրահավաքի հետ կապ չունի․ Մխիթար Հայրապետյան (տեսանյութ)
Հեղափոխության օրերին փողոցներում փակցված սև պաստառներն ու դագաղները մեր կուսակցության կողմից ոչ մի կերպ չեն ողջունվել։ Այդ մասին այսօր՝ մայիսի 27-ին, լրագրողների հետ զրույցում ասաց ԱԺ «Իմ քայլը» խմբակցության պատգամավոր Մխիթար Հայրապետյանը՝ պատասխանելով հարցին, թե չի՞ կարծում արդյոք պատգամավորը, որ հասարակության, տարբեր բևեռների բաժանվելը, գալիս է հենց հեղափոխական օրերից, երբ դաղագներ էին դրվում ու սև պաստառներ փակցվում։
«Դա պետք չի կապել մեզ հետ, մենք հակառակը՝ դատապարտել ենք նման մոտեցումները»,- ասաց Հայրապետյանը։
Ինչ վերաբերում է ակտիվիստ Ջիվան Աբրահամյանի կողմից օրերս կազմակերպված հանրահավաքին ու նրա հնչեցրած սպառնալիքներին, ապա Մխիթար Հայրապետյանն «Իմ քայլի» կողմից վստահ հայտարարում է, որ այն ևս ընդունելի չէ իրենց համար։
«Ատելության խոսք պարունակող ոչ մի հայտարարություն երբևէ մեր թիմի կողմից չեն ողջունվել։ Ինչ վերաբերում է ամսի 25-ի հանրահավաքին, ապա յուրաքանչյուր ոք իրավունք ունի իր ազատ խոսքն արտահայտել ու հանրահավաք կազմակերպել, սակայն ոչ ոք չի կարող խոսել մեր անունից։ Ու այստեղ հարցն այն է, թե արդյոք նրանք իրավունք ունեի՞ն խոսել մեր անունից։ Մեր թիմն այդ հանրահավաքի հետ որևէ առնչություն չունի»,-ընդգծեց պատգամավորը։
Դիտարկմանը, թե Ջիվան Աբրահամյանը եղել է 2018-ի դեկտեմբերի նախընտրական քարոզարշավին ժամանակ, Մխիթար Հայրապետյանն արձագանքեց․
«Տեսե՛ք, դուք ասում եք՝ կապ եղել է՝ 2018-ի քարոզարշավն եք հիշեցնում։ Գուցե կապ եղել է, բայց հիմա չկա, ու մեր թիմը այդ հանրահավաքի հետ ոչ մի առնչություն չունի»։