Մարզպետի գործն աչքին չի գալիս
Կոտայքի մարզպետն, ով կենաց-մահու պայքար է սկսել իր մարզում բոլոր այն մարդկանց և ուժերի դեմ, ովքեր «Քաղաքացիական պայմանագիր» կուսակցության անդամ չեն կամ չեն երդվում Նիկոլ Փաշինյանի անունով՝ ինչպես իրենք, մարզպետարանում իր անելիքները թողել, արձակուրդ է գնացել, որ օրվա 24 ժամը լծված լինի Աբովյանի քաղաքապետի՝ հունիսին կայանալիք ընտրություններին իրենց՝ ՔՊ-ական թեկնածուի հաղթանակն ապահովելու սուրբ գործին։
Պետրոսյանը երեկվանից՝ մայիսի 22-ից մինչև հունիսի 10-ը գտնվելու է հերթական արձակուրդում` պայմանավորված այս շրջափուլում քաղաքական գործունեության առանձնահատկությամբ։
Բնականաբար, այդ քաղաքական գործունեութունը պտտվում է ՔՊ-ական անփորձ թեկնածու Գրիգոր Գուլյանին Աբովյանի քաղաքապետ կարգելու առանցքի շուրջ։
Ավելին՝ այդ առանցքի շուրջ է կենտրոնացել ոչ միայն Ռոմանոս Պետրոսյանն, այլ նաև իր ողջ քաղաքական թիմը։
Մի ամբողջ կուսակցություն, դասերով չքաղելով անփորձների՝ պետությանը պատճառած վնասների ահռելի չափերից, նույն սխալ քայլն է կրկնում, այս անգամ՝ Աբովյանում։
Ռոմանոս Պետրոսյանն ամեն գնով Աբովյանում իր մարդն ունենալու ճանապարհին ցանկացած խոչընդոտ ու իրեն պատահած դժվարություն ներկայացնում է քաղաքական լույսի ներքո՝ դա համարելով Աբովյանի քաղաքապետի ընտրության համար պայքարող այլ ուժերի կողմից ուղղորդված շարժում։
Օրինակ՝ Պետրոսյանի եղբայրն ուտում, հաշիվ չի փակում՝ մարզպետը դա համարում է քաղաքական սաբոտաժ, Կոտայքի մարզի Ողջաբերդ գյուղի բնակիչները բողոքի ակցիա են անում՝ մարզպետից պահանջում գործ անել խոսելու փոխարեն, Ռոմանոս Պետրոսյանը դա ևս համարում է քաղաքական սաբոտաժ։
Ու էսպես՝ սաբոտաժ-սաբոտաժ բղավելով, միայն կոսմետիկ աշխատանք իրականացնելով, բայց մարզի բնակչներին իրենց խնդիրների հետ միայնակ թողնելուց, Ռոմանոս Պետրոսյանը գլորում է մարզպետի օրերն ու փորձում Կոտայքում ուժեղացնել իր դիրքերը՝ այդ մարզից բացառելով որևէ այլ քաղաքական ուժային կենտրոնի ներկայություն։
Բնականաբար, Աբովյանի քաղաքապետի ընտրություններին ընդառաջ Ռոմանոս Պետրոսյանին առավել շատ կսկսեն տանջել Կիկոսի մահը հիշեցնող քաղաքական սաբոտաժները, ուստի մարզպետին խոհեմություն և կորով ցանկանալուց բացի, այլ բան անել հնարավոր չէ։
NEWSPRESS.am