Դատարաններն արգելափակելն անտեղի էր, բայց կարևորը հասարակությունն սկսել է ինքնուրույն գնահատել․ Թևան Պողոսյան
ՀՀ նախագահի խորհրդական Թևան Պողոսյանին դուր է եկել մի շարք գործիչների, մտավորականների ու կուսակցությունների այն քայլը, որով հորդորել են վարչապետ Նիկոլ Փաշինյանին հետ կանգնել դատարաննեի մուտքերը փակելու մտքից։
Այդ մասին քաղաքագետն ասաց լրագրողնեի հետ զրույցում։ Նրա որակմամբ՝ դատարանների շենքերի արգելափակումն անտեղի էր։ Բայց այս ակցիան Թևան Պողոսյանի համար կարևոր մի հանգամանք ևս բացահայտել է՝ քաղաքացիներն սկսել ծանր ու թեթև անել տարբեր կարծիքներ ու սեփական կարծիքն ունենալ երևույթի մասին։
«Որոշ գնահատականներով ակցիային մասնակցել է 1100, մյուսներով՝ 5 հազար մարդ: Կարևորը, որ հասարակությունը սկսել է տարբեր կարծիքներ լսել և ինքնուրույն գնահատել, թե ինչպես վարվել»,- ասաց Թևան Պողոսյանը՝ դրական գնահատելով օմբուդսմենի և քաղաքական ուժերի հայտարարությունները։
Այս համատեքստում Թևան Պողոսյանը նկատում է նաև, որ նախագահ Արմեն Սարգսյանի հայտարարությունը ևս գնահատելի էր, հատկապես որ նրա լիազորությունների շրջանակում ավելին չէր էլ կարելի ակնկալել։
«Նախագահն ունի երկու հնարավորություն` հանդես գալ հայտարարությամբ կամ դիմել Սահմանադրական դատարան»,- նշեց Թևան Պողոսյանը։
Անդրադառնալով անցումային արդարադատության գաղափարին՝ Թևան Պողոսյանը նկատեց, ոլորտը բարեփոխման կարիք ունի, սակայն դրա համար կան այլ ճանապարհներ։
«Եկեք քննարկենք, տեսնենք՝ դա մե՞րն է, թե՞ ոչ: Եթե ոչ՝ հրաժարվել: Նույնը վերաբերում է վեթթինգին: Որոշ երկրներում փորձը դրական է: Ալբանիայում մոտ մեկ տարի դատական համակարգը չէր աշխատում: Մենք դրան պատրա՞ստ ենք: Անհրաժեշտ է հասկանալ՝ ինչն է մեզ համապատասխանում, իսկ ինչը՝ ոչ»,- ասաց Թևան Պողոսյանը:
Նրա խոսքով՝ առաջ նայել և ուրախանալ, որ վաղն ինչ-որ բան կստանանք, չի նշանակում, որ եղած համակարգերը պետք է կասեցնել:
«Հաջողված համակարգերը վերափոխմամբ են ստեղծվում, այլ ոչ թե ոչնչացմամբ»,- եզրափակեց Պողոսյանը։