ԱԺ աշխատակազմի ղեկավարի տեղակալը զենքո՞վ է մտել ԱԺ, թե՞ քննարկումներ են
Այսօր մայիսի 16-ի կառավարության նիստում, օրակարգային չզեկուցվող հարցերի շարքում կառավարությունը հավանություն է տվել Ազգային ժողովին լրացուցիչ ծախս տրամադրելու նախագծին:
Ինչպես նշված է տեղեկանքում, այդ գումարները նախատեսվում են ԱԺ անցակետերում անվտանգության ապահովման նպատակով տեղադրված ռենտգենային զննող սարքավորումները նոր սարքերով փոխարինելու համար:
Նիստից հետո, արդեն լրագրողների հետ զրույցում ԱԺ աշխատակազմի ղեկավար-գլխավոր քարտուղար Տիգրան Գալստյանը նկատեց, որ սարքերը բավականին հին են և անընդհատ խափանվում են: Նրա խոսքով՝ նույնիսկ այդ սարքերի պահեստամասերն այլևս արտադրությունից դուրս են:
Ռենտգենային զննող չորս սարքավորումներ ձեռք բերելու համար 85 մլն դրամ կպահանջվի:
Դիտարկմանը, թե ըստ լուրերի այդ սարքերից մեկը տեղակայված է լինելու ՀՀ ԱԺ նախագահ Արարատ Միրզոյանի մուտքի մոտ, Գալստյանը արձագանքեց. «ԱԺ նախագահի մուտքի մոտ տեղադրվելու է միայն կամարը, ռենտգեն սարքն այլ տարածքի համար է նախատեսված»:
Իսկ հարցին, թե ճի՞շտ է արդյոք, որ իր տեղակալը զենքով մուտք է գործել շենք, Գալստյանն արձագանքեց. «Սուտ է. դրանք ընդամենը քննարկումներ են»,- հավելեց նա: