Ինչու է հրապարակ նետվել պառկելու հաստիքով փող աշխատող Գասպարին
Արդեն երեք օր է՝ Երևանի ընդհանուր իրավասության դատարանում Դավիթ Գրիգորյանի նախագահությամբ շարունակվում է 2008 թվականին սահմանադրական կարգը տապալելու մեջ մեղադրվող՝ ՀՀ 2-րդ նախագահ Ռոբերտ Քոչարյանի գործով նախնական դատական նիստը, որի ընթացքում քննարկվում է Քոչարյանի խափանման միջոցը պահելու կամ վերացնելու հարցը։
Դատական նիստին զուգահեռ բողոքի ակցիաներ են իրականացվում դատարանի բակում։ Քոչարյանին քարկոծող և պաշտպանող ակտիվիստները ժամանակ առ ժամանակ թեժացնում են իրավիճակը դատարանի բակում։
Այսօրվա հերոսն, ինչպես երեկ, քաղաքացիական ակտիվիստ Վարդգես Գասպարին է։
Բոլոր անհրաժեշտ տեղերում հատուկ հրահանգով հաստիքային պառկող Վարդգես Գասպարին իր ձեռքում է պահում Քոչարյանի ընդդիմախոսների կիսատ-պռատ խմբակը՝ ամեն վայրկյան սադրիչ գործողությունների դիմելու պատրաստակամությամբ։
Երեկ, օրինակ, Գասպարին հասավ նրան, որ իրեն, իր պնդմամբ, շշով հարվածեցին, ինչի արդյունքում այսօր հարուցվել է քրեական գործ։
Այսօր Գասպարին ակնհայտ սադրանքի էր դիմում դատարանի բակում հասարակական կարգը պահպանող ոստիկանների հետ՝ փորձելով հասնել նրան, որ ոստիկանի կողմից կիրառվի բռնություն, և ինքը սովորության համաձայն կրկին հաղորդում տա ոստիկանությունում։
Թե ինչու է Գասպարին Ռոբերտ Քոչարյանի դռնբաց դատական նիստին զուգահեռ սադրիչ գործողություններ սանձազերծում դատարանի բակում, հայտնի է՝ նախ նա իր սադրանքներով շեղում է մեդիայի ուշադրությունը բուն դատավարությունից, մյուս կողմից՝ իր հաղորդման հիման վրա հարուցված քրեական գործերը նա և իրեն սատարող իրավապաշտպանները հետագայում կօգտագործեն մինչև ՄԻԵԴ հասնելու և կառավարությունից փոխհատուցում ստանալու համար, ինչպես եղավ ավելի վաղ։
Հիշեցնենք, որ վերջերս ՄԻԵԴ-ը հրապարակեց «Գասպարին ըննդեմ Հայաստանի» գործով վճիռը, որով ՀՀ կառավարությանը պարտավորեցեց Գասպարիին վճարել 4000 եվրո՝ որպես ոչ նյութական վնասի փոխհատուցում։
Հավանաբար, Գասպարին 4000 եվրոն արդեն ծախսել է ու ժամն ու պահն է հերթական ապրուստի միջոցը հայթայթելու համար։
Բնականաբար, իշխանությանն ընդամենը մի քանի րոպե ժամանակ է հարկավոր ցանկության դեպքում Գասպարիին Քոչարյանի դեմ ակցիա անողների շարքից չեզոքացնելու համար․ ակնհայտ է, որ այդ ցանկությունը չկա, ընդհակառակը հրապարակ է նետվել Գասպարին՝ որպես միակ հույս թեժ բողոքի ակցիաների իմիտացիա ստեղծելու համար։