Սուպերքննադատից սուպերվարչապետին մեկ պաշտոնն է բաժանում
Վարչապետ Նիկոլ Փաշինյանն այսօր հրավիրել է ասուլիս՝ ամփոփելու համար իր վարչապետության մեկ տարին․ վարչապետի ասուլիսին զուգընթաց Ազգային ժողովում միայն «Իմ քայլը» խմբակցության պատգամավորների քվեարկությամբ՝ 77 կողմ ձայնով 2-րդ ընթերցմամբ ընդունվեց Կառավարության կառուցվածքի փոփոխության մասին օրենքի նախագիծը, որով Պետական եկամուտների կոմիտեն, Ազգային անվտանգության ծառայությունն ու ոստիկանությունը կշարունակեն մնալ վարչապետի վերահսկողության տակ, իսկ 17 նախարարությունների թիվը կկրճատվի՝ հասնելով 12-ի։
Այս ուժային կառույցները կշարունակեն ապահովել վարչապետի սուպերվարչապետությունը, քանի որ հենց ԱԱԾ-ի և ոստիկանության միջոցով է, որ իշխանությունն իրականացնում է այն, ինչը ցանկանում է․ այդպես էր Սերժ Սարգսյանի ժամանակ, այդպես է նաև Նիկոլ Փաշինյանի օրոք։
Ընդդիմադիր պատգամավոր Նիկոլ Փաշինյանն ինչպես իր տված բազմաթիվ խոստումների հարցում, սուպերվարչապետությունից հրաժարվելու՝ Սերժ Սարգսյանին ուղղած պահանջների մասին ևս մոռացել, նոր էր եկել Ազգային պատկերասրահ՝ ամփոփիչ ասուլիսի։
Փաշինյանը ժամանակին արած քննադատությունն, ինչն իրեն ապահովում էր քաղաքական դիվիդենտներ, հեռախոսի մեջ պահվող ֆայլում չէր գրանցել։
Պարզվում է, որ երբ ՊԵԿ-ը, ԱԱԾ-ն և ոստիկանությունը Սերժ Սարգսյանի ենթակայության տակ էին, վատ էր, իսկ այժմ՝ ճիշտ հակառակ պատկերն է։
Փաշինյանը սուպերվարչապետության հարցի քննարկումն իջեցնում է «պլինտուսի» մակարդակի.
«Սուպերվարչապետը բա կկանգնի՞ կարմիր լույսի տակ, կամ որպես վկա արդյոք կգնա դատարանում հարցաքննությա՞ն, բա սուպերվարչապետը 5 ասուլիս կտա՞»,- հարցնում է Փաշինյանը ու հավաստիացնում, որ «սուպերվարչապետական համակարգն այն է, որ վարչապետը դատավորին ասի՝ ինձ քո կայացրած վճռի մասին նախապես տեղեկացրա, նոր կայացրա»՝ մոռանալով Քոչարյանի գործով հայտնի գաղտնալսումը։
Փաշինյանն, ով Սերժ Սարգսյանին մեղադրում էր անձնիշխանական համակարգ կառուցելու և խորհրդարանին կցորդ սարքելու մեջ, առանց հիշողությունը ռեսթարթ անելու, այսօր շարունակում է նույնն անել, բացառությամբ մեկ-երկու կոսմետիկ նորոգումների՝ Բաղրամյան 26-ի և Ազգային ժողովի դարպասների բացումը հասարակության առաջ․ բայց արդյոք դա բովանդակային որևէ նշանակությո՞ւն է ունեցել որևէ մեկի համար. իհարկե՝ ոչ։
Իհարկե, մենք երկրորդ Սերժ Սարգսյան չենք ուզում, բայց կրկնում ենք՝ էժանագին մանիպուլյացիաների պետք չէ դիմել, որովհետև այդ նույն սուպերվարչապետն ինքը՝ Փաշինյան Նիկոլն է։