Ինչի համար է Թրամփին պետք Փաշինյանը
ՀՀ և Ադրբեջանի ԱԳ նախարարներ Զոհրաբ Մնացականյանի ու Էլմար Մամեդյարովի՝ Վաշինգտոնում, ԱՄՆ պետքարտուղար Մայք Պոմպեոյի հովանու ներքո հնարավոր սպասվող հանդիպմանը ընդառաջ, ավելի ու ավելի են արդիական դառնում ինչպես հայ-ամերիկյան հարաբերությունների, այնպես էլ Ղարաբաղյան հակամարտության կարգավորման հետ կապված՝ ամերիկյան կողմի ներգրավվածության մասին քննարկումները։
Առհասարակ, հայ-ամերիկյան հարաբերությունների մասով խոսակցությունները ոչ միայն Հայաստանում են, այլ նաև արտերկրի մամուլում, սոցկայքային հարթակներում ու փորձագիտական շրջանակներում։ Վերջերս «Քարնեգի» հիմնադրամի փորձագետներից Պոլ Ստրոնսկու թվիթերյան գրառումները կարելի է համարել ամերիկյան փորձագիտական շրջանակներում թևածող գաղափարների՝ այսպես ասած՝ համաձուլվածքը, ամերիկյան կողմի՝ Երևանից ունեցած դժգոհության ու հավակնությունների ձևակերպված տեսքսը։
Հասկանալի է, որ Սպիտակ տան ներկայիս վարչակազմը, որը բավական լուրջ ծրագրեր ունի, կապված Իրանին ծնկի բերելու հետ, այժմ ամեն բան անում է Թեհրանին մեկուսացնելու համար։ Ու այս առումով Երևանն ակամա հայտնվել է տեսադաշտում, իսկ Հայաստանի ներկայիս իշխանությունների՝ Իրանի հետ վարած քաղաքականությունն էլ դարձել է որոշակի խնդիրների պատճառ։ Մյուս կողմից, Փաշինյանի ընդգծված ռուսահաճ կեցվածքը վերջին շրջանում ու այն, որ նա արդեն ռուսական մամուլին տված իր հարցազրույցներում է խոսում Ամերիկային քննադատելու մասին, երկրորդ ճակատ է բացում հայ-ամերիկյան հարաբերություններում խնդիրների համար։
Ռուսական «Ռեգնումը» բավական բաց տեքստով, իր վերլուծականներից մեկում արձանագրում է, որ Փաշինյանը հեռանում է Վաշինգտոնից, այն դեպքում, երբ ռուսական փորձագետներից Ալեքսեյ Մարտինովն էլ կարծում է, որ Թրամփն ամեն գնով ուզում է դառնալ Ղարաբաղյան հակամարտության կարգավորողն ու Կովկասի խաղաղարարը, ինչը կարևոր հանգամանք է Կովկասը Ռուսաստանից կտրելու ու Մեծ Մերձավոր Արեևելքին միացնելու քաղաքական հեռահար պլանավորման մեջ։ Ուստի հնարավոր է, որ Մնացականյան-Մամեդյարով հանդիպմանը Երևանին առանձնակի ուշադրություն դարձվի ու փորձ արվի գայթակղել հայկական կողմին տարբեր գործակցային ֆորմատներով, ներդրումային ծրագրերով։
Ու այստեղ Երևանի պահվածքը լինելու է վճռորոշ, քանի որ այդ պահվածքից է կախված այն, թե Ամերիկան ինչ հայացքով կշարունակի նայել Փաշինյանին, կշարունակի համարել քաղաքակիրթ ղեկավա՞ր, թե՞ կհամարի սովորական կրեմլյան կցորդ։
NEWSPRESS.am