Քոչարյանի ազատումն ու նոր թշնամու պահանջը
2019 թվականի մայիսի 19-ին լրանում է 2-րդ նախագահ Ռոբերտ Քոչարյանի կալանքի ժամկետը, իսկ մինչ ժամկետի ավարտը Սահմանադրական դատարանն այսօր հօգուտ Ռոբերտ Քոչարյանի որոշում է կայացրել։
ՀՀ Սահմանադրական դատարանը, քննության առնելով ՀՀ երկրորդ նախագահ Ռոբերտ Քոչարյանի դիմումը ՀՀ քրեական դատավարության օրենսգրքի 419-րդ հոդվածի 2-րդ մասի վերաբերյալ, որոշեց, որ ՀՀ վճռաբեկ դատարանը գործն ըստ էության չլուծող դատական ակտերի վերաբերյալ կայացնում է վերջնական դատական ակտ և հենց այդ մեկնաբանությամբ նորմը համապատասխանում ՀՀ Սահմանադրության պահանջներին:
Սահմանադրական դատարանի այս դիրքորոշումը նշանակում է, որ գործն ըստ էության չլուծող դատական ակտերի, այդ թվում՝ կալանքը որպես խափանման միջոց ընտրելու մասին որոշումների բողոքարկման դեպքում Վճռաբեկ դատարանը չի կարող գործը ուղարկել նոր քննության, այլ ինքը պետք է կայացնի վերջնական որոշում:
Սահմանադրական դատարանը նաև նշել է, որ, հաշվի առնելով այն հանգամանքը, որ օրենքը Ռոբերտ Քոչարյանի նկատմամբ Վճռաբեկ դատարանի կողմից կիրառվել է այլ՝ Սահմանադրական դատարանի մեկնաբանությունից տարբերվող մեկնաբանությամբ, Ռոբերտ Քոչարյանի նկատմամբ կայացված դատական ակտը նոր հանգամանքի ի հայտ գալու հիմքով ենթակա է վերանայման՝ օրենքով սահմանված կարգով։
ՍԴ այս որոշումը նշանակում է, որ կա՛մ Վճռաբեկ դատարանը պետք է Քոչարյանի կալանավորման վերաբերյալ վերջնական վճիռ կայացնի, կա՛մ նրան ազատ արձակի, իսկ հաշվի առնելով Քոչարյանի գործը քննող դատավորների ինքնաբացարկի շթղան, արդեն չի բացառվում, որ մոտ օրերս Քոչարյանն ազատ արձակվի, ինչը պարզապես ցույց կտա հայաստանյան արդարադատության իրական պատկերը։
Արդեն տևական ժամանակ է՝ 2-րդ նախագահի գործը մի դատավորից մյուսի ձեռքն է անցնում, պաշտպանները պնդում են, որ Քոչարյանին կալանքի տակ պահելու հիմքեր դատարանը չունի, իսկ արդեն չորս դատավոր նրա գործով ինքնաբացարկ է հայտնել։
Տպավորություն է ստեղծվել, որ էն գլխից Քոչարյանին սխալ մեղադրանք է առաջադրվել, ինչն այսօր որևէ կերպ չի տեղավորվում արդարադատության համատեքստում, ուստի դա գիտակցում են նաև դատավորները և հրաժարվում նրա գործը քննելուց, ինչի արդյունքում էլ առաջացել է ներկայիս իրավիճակը։
Սրան զուգահեռ, ունենք նաև բոլորոիվին այլ պատկեր՝ Փաշինյանի հայացքով․ նա հայտարարում է, որ Մարտի մեկի գործը բացահայտվել է, թեև մինչ այսօր 10 քաղաքացու սպանության համար որևէ մեկին մեղադրանք առաջադրված չէ։
Եթե Քոչարյանն ազատ է արձակվում, ստացվում է՝ Մարտի 1-ի բացահայտման ֆարսը պատին է դեմ առել, ինչից գլուխ չի հանում մի ողջ ուժային համակարգ:
Սխալ կարված քրեական գործի հանգույցներն այլևս ձգել հնարավոր չէ, իսկ այդ պարագայում վարչապետ Փաշինյանն իր իշխանությունը երկարացնելու համար ստիպված է լինելու կերտել նոր չար կերպարներ․ լոկ խոստումներով և գործի իմիտացիայով նա երկար գոյատևել այլևս չի կարող։
NEWSPRESS.am