ՀՅԴ կոմիտե. Արաբկիրում երեկ պալարը պայթեց

Հայ Հեղափոխական Դաշնակցության Արաբկիրի «Կոմիտաս» կոմիտեն իր խոր մտահոգությունն է հայտնում Արաբկիրի թաղապետարանում տիրող իրավիճակի վերաբերյալ։

«Որոշ ժամանակ է՝ ականջալուր էինք թաղապետարանի անձնակազմի հանդեպ թաղապետ պարոն Արամ Դանիելյանի ոչ-կոռեկտ վերաբերմունքի մասին։ Սակայն չէինք հրապարակայնացնում՝ այն չքաղաքականացնելու համար։ Աշխատակիցների վրդովմունքին ականջալուր չեղավ նաև Երևանի քաղաքապետարանը: Երեկ պալարը պայթեց. Արաբկիրի թաղապետարանի շուրջ 90 աշխատակիցների ստորագրությամբ թաղապետի դեմ բողոքի գրություն կազմվեց ու հանձնվեց Երևանի քաղաքապետարան։

Յուրաքանչյուր աշխատակից՝ անկախ իր զբաղեցրած պաշտոնից, սեռից, կրոնական թե քաղաքական հայացքներից ունի պարտավորություններ, սակայն ՀՀ օրենսդրությամբ ու մարդկային փոխհարաբերության հիմնական հասկացություններով սահմանված ունի նաև իրավունքներ: Գործատերն ու բարձրաստիճան պաշտոնյան նախ և առաջ պարտավոր են հարգել իրենց աշխատակիցների իրավունքները, այնուհետև աշխատավորներից պահանջել լիովին գործադրել իրենց պարտավորությունները։ Ընդունելի չէ՝ ուղղակի թե անուղղակի միջոցներով մարդկանց ազատել իրենց աշխատանքից կամ, շահագործելով աշխատանքը կորցնելու վախը, փորձել նրանց հպատակեցնել։

Արձանագրելով, որ Արաբկիրի թաղապետի նշանակումը ՀՀ իշխանությունների կադրային ձախող քաղաքականության ևս մեկ դրսևում է, Հայ Յեղափոխական Դաշնակցության Արաբկիրի «Կոմիտաս» կոմիտեն հայտարարում է` պատրաստակամ է հանուն համայնքի բարորության, թաղապետարանի հետ գործակցել, վերականգնելու փոխադարձ վստահությունը թաղապետի, թաղապետարանի անձնակազմի ու համայնքի բնակչության միջև»,- ասված է Հայ Յեղափոխական Դաշնակցության Արաբկիրի «Կոմիտաս» կոմիտեի տարածած հայտարարության մեջ։