«Թող օրը քաղցրով սկսվի»․ երթուղայինի վարորդը կոնֆետներ էր բաժանում ուղևորներին
Ասում են՝ երկուշաբթին ծանր օր է․ չգիտեմ՝ գուցե, բայց այս երկուշաբթին հաճելի անակնկալով սկսվեց։
Առավոտյան, սովորականի նման, շտապում էի աշխատանքի: Դարձյալ սովորականի նման, երկար սպասեցի՝ մինչև եկավ իմ երթուղային տաքսին։ Մի քիչ նեղսրտած էի երթուղայինի ուշացման համար, մի քիչ նրա համար, որ ինքս եմ ուշանում աշխատանքից ու մի քիչ էլ մտազբաղ՝ օրվա անելիքների հետ կապված։ Ի վերջո, նստում եմ երթուղային ու․․․ անակնկալ՝ վարորդը կոնֆետ է առաջարկում։
«Էս կոնֆետը վերցրեք»,- ասում է նա։ Զարմացած նայում եմ ու հարցնում․ «Ինչ-որ առիթ կա՞»։ Ու տրանսպորտի մեջ նստած բոլոր ուղևորները բարի ժպտում են։ Նրանցից մեկը արձագանքեց․ «Չէ՛, առիթ չկա, վարորդը պարզապես բոլորին բաժանում է կոնֆետներ»։
Վարորդն էլ իր հերթին հաստատում է․ «Հա՛, թող օրը քաղցրով սկսվի»։
Այդ պահին վարորդին գուցե չհասկացա, բայց շնորհակալություն ասացի ու ժպտացի։ Հաջորդ կանգառում նույնը կրկնվեց․ բարձրացողները կոնֆետներ ստացան։
«Վերցրեք, բոլորին բաժանեք»,- ասաց վարորդը։
Ուղևորներից մեկը հարցրեց․ «Էդ դուք ինչքա՞ն օգուտ ունեք, որ կոնֆետ եք տալիս բոլորին»։ Վարորդը ժպտաց․ «Թո՛ղ մի օր էլ օգուտ չունենամ, համ էլ, որ մարդիկ նստում են, կոնֆետը տալիս եմ ու ժպտում են՝ արդեն լավ եմ զգում դրանից, ու իմ օրն էլ հաջող է լինում»։
Անցանք ևս երկու կանգառ․ ուղևորների թիվը գնալով աճում էր, իսկ վարորդի կոնֆետները չէին վերջանում։ Այդ ընթացքում նստեցին ամենատարբեր մարդիկ, ամենատարբեր հոգսերով ու դեմքի արտահայտություններով, բայց, վերցնելով վարորդի առաջարկած կոնֆետները, բոլորը միանգամից սկսում էին ժպտալ։
Մին կին չդիմացավ․ «Վա՛յ, էս ինչ լավ մարդ ես դու։ Որ քո նման երկու մարդ էլ տեսնեմ, է՛լ մտածելու բան չի լինի, խնդիրներս լրիվ կլուծվի»,- ասաց կինն ու ծիծաղեց։
Տրանսպորտում բոլորն ասում-խոսում, ուրախանում էին։ Ոչ մի տխուր մարդ չկար, ոչ մի մտահոգ դեմք չէիր տեսնի։ Վարորդն իր դիմացի հայելիով նայում է իր մեքենայի մեջ նստած մարդկանց ու բարի ժպտում։ Նայում եմ նրան, ու կարծես փորձում հասկանալ կոնֆետի գաղտնիքը։ Նա մեկ հատիկ կոնֆետի մեջոցով բարությունն ու ժպիտ էր փոխանցում մարդկանց։ Ընդամենը 1 հատիկ կոնֆետ, որի մեջ դրված է մարդկային վերաբերմունքը, դիմացինի նկատմամբ։
Որքան քիչ բան է պետք ժպտալու համար․․․
Արմինե Մկրտումյան