Զինվորին ու ուսուցչին 10 տոկոս, Մարությանին՝ 1 մլն 200 հազար դրամ
Երևանի քաղաքապետ Հայկ Մարությանին ստացած 570 հազար դրամ աշխատավարձն ապրելու համար հերիք չի անում:
Մարությանը որոշել է աշխատավարձն ավելացնել՝ այն հասցնելով 1 մլն 200 հազար դրամի՝ հավանաբար այն մտայնությամբ, որ վարչապետ Փաշինյանից որևէ բանով պակաս չէ ու նրա չափ էլ աշխատավարձ պետք է ստանա:
Այսուհետ բարձր աշխատավարձեր կստանան նաև Երևանի քաղաքապետարանի 1700 աշխատակիցները. նրանց բոլորի աշխատավարձերը կբարձրանա 30 տոկոսով:
Ամենևին չցանկանալով երկրում ունենալ ցածր աշխատավարձ ստացող աշխատուժ, միևնույնն է, անհնար է համեմատականներ չտանել զինվորի, ուսուցչի և քաղաքապետարանի աշխատակիցների աշխատավարձերի միջև:
Ուսուցիչների և սահմանը պահող զինծառայողի աշխատավարձի 10 տոկոս բարձրացման ֆոնին Մարությանի 1մլն 200 հազար դրամ աշխատավարձը, մեղմ ասած, սիրուն չի նայվում:
Իսկ եթե հաշվենք նաև այն 10. 000 պետաշխատողներին, որոնք կառավարության կառուցվածքի փոփոխության և երկրում մեկնարկած լայնածավալ օպտիմալացման արդյունքում կմնան անգործ, Մարությանի այս որոշումը պարզապես դառնաում է հակապետական մի քայլ:
Եթե Երևան քաղաքի բյուջեն այնքան շատ է, որ կարելի է բոլոր ծախսերը փակել ու մի հատ էլ աշխատավարի բարձրացում անել ոչ թե 10, այլ 30 տոկոսով, ապա դրա փոխարեն ճիշտ կլիներ վերանալ բացառապես սեփական անձի մասին մտածելու վատ սովորությունից և, օրինակ, Երևանի քաղաքապետարանի ենթակայության տակ գտնվող մանկապարտեզները դարձնել անվճար, այդ գումարով կարելի է մեկ անօթևանի խնդիր լուծել. սրանք օրինակներ են, որոնց շարքը կարելի է լրացնել:
Մարությանը նման քայլերով գոնե նեղ շրջապատում առիթ կունենար հպարտանալու, որ թեև դերասան է, բայց քաղաքապետարանում էլ գործ անել գիտի: Թե չէ՝ ստացվում է՝ ավագանու նիստերի օրակարգի հարցերը թղթից ծայրեծայր կարդալու, անընդհատ սխալվելու, ավագանու ընդդիմադիր խմբակցության անդամների հարցերից մտքի թելը կորցնելու,Երևան քաղաքն աղբի մեջ ողողված թողելու և տված խոստումների 90 տոկոսից «թռնելու» համար կարգին Հայկոն ստանում է բարձր աշխատավարձ:
Իսկ արդյո՞ք ստացած աշխատավարձն ու ցուցաբերած մասնագիտական կարողությունները համահունչ են իրար. թողնում ենք մեր ընթերցողների դատին:
NEWSPRESS.am