Փաշինյանն ակնհայտ զգուշանում է Տիգրան Սարգսյանից
Հայաստանում ԵԱՏՄ նիստի ընթացքը ցույց տվեց, որ ՀՀ նախկին վարչապետ Տիգրան Սարգսյանն անսասան կերպով կշարունակի վայելել իր պաշտոնը: Եթե հեղափոխությունից հետո քաղաքական հետապնդումներ տեղի են ունենում նախկին իշխանության ներկայացուցիչների դեպքում, ապա Տիգրան Սարգսյանի կողքով Փաշինյանն ու իր թիմակիցները պարզապես շրջանցելով են անցնում:
ՀԱՊԿ-ում տապալումից հետո Փաշինյանը պարզապես վախենում է Տիգրան Սարգսյանի «էշին չոշ» ասելուց, պատկերացնում է, թե ինչ կկատարվի իր հետ, եթե Տիգրան Սարգսյանին անցկացնի որևէ քրեական գործի շրջանակներով և որևէ, թեկուզ աննշմար, խնդիր առաջացնի Եվրասիական տնտեսական հանձնաժողովի նախագահի անվան հետ:
Փաշինյանը հաշվարկում է՝ չունի կադր ԵԱՏՄ-ին համարժեք, ինչպես չուներ կադր ՀԱՊԿ-ին համարժեք, երբ Յուրի Խաչատուրովին հետ կանչեց: Փաշինյանը շատ լավ է հասկանում՝ եթե, օրինակ, իր աներձագ Հրաչ Հակոբյանին փորձի սղցնել Տիգրան Սարգսյանի փոխարեն, որչափ «պռավալ» կգնա տարբեր հարթություններում: Պետք չէ նաև մոռանալ նախկին վարչապետի կապերը Կրեմլի հետ: Այս ամենը խոսում է միայն այն մասին, որ Փաշինյանը պարզապես պետք է հաշվի նստի Տիգրան Սարգսյանի հետ, լինի հարգանքով և խիստ զգույշ՝ հանկարծ թե Սարգսյանը չզայրանա:
Երկրի ԱԱԾ-ն, ոստիկանությունն ու Փաշինյանն անձամբ չեն կարողանում մշտապես պետական բարձր պաշտոններ զբաղեցրած, կոռուպցիոն համակարգի կիզակետում գտնված մարդու շուրջ օղակը սեղմել և ինչ-որ բացահայտումով հանդես գալ: Այն մարդու հետ կապված, ով Սերժ Սարգսյանի օրոք, ըստ լուրերի, կարողացավ քաղաքական թիմ ձևավորել՝ իրեն հավատարիմ նախարարներով ու պատգամավորներով, ունենալ սեփական ֆինանսաօլիգարխիկ բևեռը, եթե հրաժարականով չկանխվեր, ապա այսօր կունենար սեփական կլանը՝ միլիարդավոր դոլարների շրջանառությամբ, որն էլ կապահովոր Սևանա լիճը մեծ ձկնաբուծարան դարձնելու իր պլանը:
Քննության չեն առնվում նաև Տիգրան Սարգսյանի հասցեին ընդդիմադիր գործիչների կողմից հնչեցված ոչ մի խոսք՝ կապված բյուջեի չարաշահման, անօրինականությունների հետ:
Փաշինյանն այն աստիճան է զգուշանում Տիգրան Սարգսյանից, որ դեսպանների փոփոխության ժամանակ շրջանցեց նաև Տիգրան Սարգսյանի եղբորը՝ Արմեն Սարգսյանին, ով այս պահին Բուլղարիայի Հանրապետությունում ՀՀ արտակարգ և լիազոր դեսպանն է:
Փաշինյանի «վլաստի» զարգացման ճանապարհին մշտապես ճակատագրային են լինում Սարգսյան ազգանուն կրողները: Նախ, Սերժ Սարգսյանի ֆակտորն էր Փաշինյանի կոկորդին, ապա նախագահ Արմեն Սարգսյանը՝ հանրության մեջ բարձր վարկանիշով, հիմա նաև Տիգրան Սարգսյանը, ով Փաշինյանի՝ արտաքին քաղաքականության ոլորտում իսկական թելադրող ուժ է: