Աչքը տեսածից է վախենում. մաքսատան օրինակով՝ ԵՊՀ-ում անգամ բուֆետապանին են համազգեստ տրամադրել. Փաշինյանն էր գալու
ՀՀ վարչապետ Նիկոլ Փաշինյանի մաքսատուն այցն ու դրոշի հայտնի պատմությունը դեռ երկար կմնա շատերի հիշողության մեջ: Շատերի համար այդ պատմությունը ուղղակի պատմություն է, իսկ ոմանք այդ ամենից դասեր են քաղել ու հետևություններ արել: Այդ այցը ցույց տվեց, որ ինչ-որ կառույց այցելելիս, վարչապետն ուշադրություն է դարձնում ամեն ինչին: Շատ դեպքերում նրա ուշադրության կենտրոնում հայտնվում են ինչ-որ դետալներ, որոնք առաջին հայացքից կարող էին վրիպել վարչապետի աչքից:
Այսօր էլ նախատեսված էր վարչապետի այցը ԵՊՀ-ի տնտեսագիտության ֆակուլտետ: Դեռ վաղ առավոտից տարածքում կատարվում էին ինչ-որ «տարօրինակ իրադարձություններ»: Հատկանշական է, որ դեռ վաղ առավոտից տարածքում էին ոստիկաններն ու անվտանգության աշխատակիցները: Նրանք տարածքից հեռացնում էին բոլոր այն ավտոմեքենաները, որոնք չէին պատկանում դասախոսներին ու համալսարանի աշխատակիցներին: Սովորաբար, այդ տարածքի ավտոկայանատեղիում իրենց մեքենաներն են կայանում ուսանողներն ու ուսանողուհիները: Հարց է առաջանում միայն, թե որքա՞ն ժամանակ այն կմնա դասախոսների տրամադրության տակ:
«Սև շենքի» տարածքում աշխատում են անվտանգության աշխատակիցները, իսկ շենքի դիմացից հեռացվում են բոլոր ավտոմեքենաները: Տեղում են ոստիկանական ավտոմեքենաները: Սակայն օրվա ամենատարօրինակ իրադարձությունը տեղի է ունեցել «Սև շենքին» կից՝ հայ բանասիրության ֆակուլտետում:
NEWSPRESS.am-ի հետ զրույցում ֆակուլտետի ուսանողներից մեկը, ով հասկանալի պատճառներով չցանկացավ ներկայանալ, նշեց, որ դեռ առավոտից իրենց ֆակուլտետի բուֆետի աշխատակիցները հագել էին նոր համազգեստ. «Մի քանի անգամ տեսել ենք աշխատակիցներին հին ու մաշված համազգեստով, սակայն, սովորաբար, նրանք աշխատում են առանց համազգեստի, իսկ այսօր առավոտյան բուֆետ մտնելով՝ զարմացանք, որ նրանք հագել էին բոլորովին նոր համազգեստ: Հետո տեսնելով, որ տարածքում ոստիկաններն են ու հեռացվում են ուսանողների ավտոմեքենաները հասկացանք, որ վարչապետն է գալու»:
Փաստորեն, «ինչ-որ մարդիկ» մաքսատան դեպքից հետո հասկացել էին, որ միգուցե վարչապետը գա և մտնի նաև Հայ բանասիրության ֆակուլտետ և րոպե առաջ կանխել էին, որ իրենց աշխատակիցները չհեռացվեն աշխատանքից՝ առանց համազգեստի աշխատելու համար: Չէ՞ որ ոմանք մնացին առանց աշխատանքի, պատին հենված դրոշի համար...