Այո, իհարկե, վստահում եմ ԱԱԾ-ի գործողություններին. Լենա Նազարյանը բացառում է, որ որևէ պաշտոնյայի գլխին կարող են «գործ սարքել» (տեսանյութ)

Ոչինչ չգիտենք, մեզ դեռ հասանելի չեն փաստերը: Այդ մասին այսօր Ազգային ժողովում լրագրողների հետ զրույցում ասաց ԱԺ փոխխոսնակ, «Իմ քայլը» դաշինքի պատգամավոր Լենա Նազարյանը՝ խոսելով ՊՎԾ պետ Դավիթ Սանասարյանին առաջադրված մեղադրանքի մասին: 

«Նախաքննության մարմինը դեռ աշխատանք ունի անելու, այսինքն՝ նախաքննություն է ընթանում: Ամենահամառ բանն էլ աշխարհում փաստն է, փաստերը կներկայացնեն, մենք էլ տեղյակ կլինենք»,- նշեց Նազարյանը: 

Քաղաքական գնահատական տալով՝ Նազարյանը նշեց, որ իրենք ասել են, որ կոռուպցիայի չարաշահումների, վատնումների դեմ պայքարում իրենք չեն բաժանելու մարդկանց յուրայինների և օտարների:

«Ինչպես և նախկինում, այդ բաժանումը չի լինելու: Կարծում եմ՝ արդեն համոզվել եք, քանի որ կոռուպցիայի դեմ պայքարի շրջանակներում ներգրավված է եղել և՛ փոխնախարար, և՛ մաքսային, հարկային գործիչներ»,- ասաց նա:

Լրագրողի հարցին, թե կա՞ն արդյոք ԱԱԾ-ի գործողությունների կասկածելու հիմքեր, ԱԺ փոխխոսնակը պատասխանեց. «Ես որևէ մեկի հանդեպ կասկած չունեմ: Արդեն ասացի, որ ամենահամառ բանը փաստն է: Փաստեր կլինեն, կխոսեն բոլորը: Այո, իհարկե, վստահում եմ ԱԱԾ-ի գործողություններին: Դավիթ Սանասարյանն էլ կարող է ի պաշտպանություն իրեն գործել»: 

Նա նաև նշեց, որ բացառում է, որ որևէ պաշտոնյայի գլխին կարող են «գործ սարքել»:

Մանրամասները՝ տեսանյութում