Հարց, որին 4 տարբեր լուծումներ են տրվել
Ինչպես հայտնի է՝ ապրիլի 21-ին, ըստ Հայ Առաքելական եկեղեցու տոնացույցի, նշվում է Ս․ Զատկի տոնը, որը համարվում է հինգ տաղավար տոներից մեկը, այսինքն՝ վերջինիս հաջորդ օրը, այսինքն՝ ապրիլի 22-ին՝ մեռելոց է։ Մեռելոցներ ունեն տարվա մեջ հինգ տաղավար եկեղեցական տոները։ Դեռևս Տիգրան Սարգսյանի ժամանակներից որոշում կայացվեց այդ մեռելոցները հայտարարել ոչ աշխատանքային։
Հասարակության մեջ, բնականաբար, այդ որոշումը երկակի քննարկումների առիթ տվեց։ Եղան և՛ որոշման կողմ արտահայտվողներ, և՛ դեմ։ Դեմ արտահայտվողները մատնանշում էին, որ առանց այն էլ Հայաստանում ոչ աշխատանքային օրերը բավական շատ են, և Հայաստանն այն տնտեսական վիճակում չէ, որ աշխատանքային օրերի հաշվին ոչ աշխատանքային օրերի թիվը շատացնի։ Տիգրան Սարգսյանի վարչապետության ողջ ընթացքում հարցը քննարկվեց, քննադատվեց, սակայն իշխանությունները հետքայլի չգնացին։ Տիգրան Սարգսյանին հաջորդած Հովիկ Աբրահամյանը իր վարչապետության սկզբում փորձեց մեռելոցները հանել։ Այն ժամանակ հրապարակումներ հայտնվեցին մամուլում այն մասին, որ Հովիկ Աբրահամյանի և Գարեգին 2-րդ Ամենայն Հայոց կաթողիկոսի միջև այս առնչությամբ բավական սուր խոսակցություն է եղել, և կաթողիկոսը նույնիսկ հայտարարել է, որ հարցը կարող է տեղափոխել այն ժամանակվա նախագահ Սերժ Սարգսյանի հետ քննարկման տիրույթ։
Հովիկ Աբրահամյանը, իրեն հատուկ «պարտադիր բայց ոչ պարտադրված» ոճով կոմպրոմիսը գտավ։ Տարվա հինգ մեռելոցների մի մասը մնաց ոչ աշխատանքային՝ Ս․ Ծնունդ, Ս․ Զատիկ, Խաչվերաց, իսկ մյուս մասը՝ Պայծառակերպություն և Վերափոխում, դարձավ հարաբերական աշխատանքային, այսինքն, պաշտոնապես ոչ աշխատանքային չեղան, սակայն գործատուներին հորդորվեց թույլ տալ իրենց աշխատակիցներին գնալ գերեզմանոց իրենց հանգուցյալներին այցի։ Հովիկ Աբրահամյանին հաջորդեց Կարեն Կարապետյանը։ Բոլորին բարձր տրամադրություն ունենալ և ժպտալ հորդորող Կարեն Կարապետյանի վարչապետության օրոք հարցին առանձնապես անդրադարձ չեղավ։
Հասկանալի է, անելիք շատ կար և մեռելոցներն այնքան էլ առաջնահերթ խնդիր չէին։ Եվ ահա իշխանափոխությունից հետո, երբ արդեն ոչ թե անցումային ժամանակավոր կառավարությունն է գործում, այլ հիմնականը, որոշում է կայացվել, որ Ս․ Զատկի մեռելոցը չպետք է լինի ոչ աշխատանքային, այլ պետք է լինի աշխատանքային օր։
Մայր Աթոռն արդեն իր պաշտոնական դիրքորոշումը հայտնել է՝ այս քայլը, արված կառավարության կողմից, համարելով հետընթաց քայլ և պարզաբանելով ևս մեկ անգամ մեռելոցի՝ որպես կրոնական և կենցաղ-մշակութային իրողության կարևորությունը ժողովրդի կյանքում։ Թերևս սրան ի պատասխան էլ կառավարության աշխատակազմի ղեկավար Էդուարդ Աղաջանյանն, ըստ էության, փորձելով բառախաղի օգնությանը դիմելով, հնարավոր բացասական էֆեկտը մեղմել, գրել է իր ֆեյսբուքյան էջում, որ կառավարությունը ոչ թե հայտարարել է աշխատանքային օր, այլ չի հայտարարել ոչ աշխատանքային օր։ Որպես հիմնավորում, Աղաջանյանը վկայակոչել է այն, որ միայն Ս Ծննդյան տոնի մեռելոցի ոչ աշխատանքային լինելն է օրենքով ամրագրված։
NEWSPRESS.am