Մեր քաչալ գլխին, 124 մլն դրամի քեֆ անելն էր մնացել
«Քաղաքացու օրվան» նվիրված միջոցառումների իրականացման նպատակով հատկացվեց 124,146.5 հազար դրամ` բյուջեի պահուստային ֆոնդի հաշվին:
Այս ահռելի գումարը մեր նորօրյա իշխանությունները կմսխեն մեկ օրվա հաճույքների և սեփական անձի փառավորման համար: Նրանք չեն լսել հուսահատության «Գազել»-ների և մահվան վերելակների, աղետի գոտու, ոռոգման համակարգի խնդիրների, ճանապարհաշինության, ենթակառուցվածքների բացակայության մասին, նրանք միայն սիրում են փողը ծախսել հաճույքների համար:
Ի դեպ, տրամադրված գումարն այն բյուջեից է, որը գոյացել էր նրանց ոչ համախոհ քաղաքացիների մուծած հարկերի շնորհիվ և որոնց Նիկոլ Փաշինյանը հեգնում էր ու ուղարկում այդ օրը խաշ ուտելու. «Դե իրենք, ինչպես միշտ, թող գնան խաշ ուտելու, ինչպես նախկինում արել են։ Կարծում եմ՝ իրենց հին ռեստորաններում տեղ կա, որ բոլորով տեղավորվեն»:
Հիմա հա՞րց, ստացվում է՝ ոչ համախոհներն այդ օրը պետք է վճարեն իմքայլականների տոնախմբության և զվարճանքի համար, իսկ ո՞վ պետք է տա ոչ համախոհների խաշի գումարը, միգուցե Փաշինյա՞նն իր անձնական միջոցներից:
Ի դեպ, հաճույքներին ուղղված 124 միլիոն դրամով հնարավոր էր լուծել օր առաջ լուծման անհրաժեշտություն ունեցող բազմաթիվ խնդիրներ, օրինակ, եթե մտահոգ ու հայրենիքը, քաղաքը սիրող ղեկավարներ ունենայինք, Քաղաքացու օրվա առթիվ նույն քաղաքացուն նվեր կանեին այդ գումարով լուծելով ներքոհիշյալ խնդիրները:
Բերված են Երևանում առկա խնդիրները և լուծման համար պահանջվող գումարի չափերը.
-Ոռոգման ենթակառուցվածքներ- 74 միլիոն դրամ
-Վթարայնության աստիճանի հենապատերի նորոգում-90 միլիոն դրամ
-Հրազդանի կիրճի բարեկարգում-2 միլիոն դրամ
-Մայրուղիների և փողոցների վերանորոգում- 50 միլիոն դրամ
-Փողոցների պահպանում և շահագործում- 83 միլիոն դրամ
-Վերելակների վերանորոգում 109 միլիոն դրամ
-Գետերի հուների մաքրում 38 միլիոն դրամ
Հասարակական զուգարանների պահպանում-ընդամենը 2 միլիոն դրամ
Շենքերի և շինությունների հետազոտման աշխատանքներ 15 միլիոն դրամ
-Վթարային պատշգամբներ-53 միլիոն դրամ
-Կոյուղագծերի կառուցում-4 միլիոն դրամ:
Էլ չենք խոսում զուտ սոցիալական խնդիրների մասին, որոնք ոչ մի քայլ չեն նահանջել։
Այս ամենը կարելի է նույնացնել ամանորյա խնջույքի կամ խրախճանքի հետ․ մարդիկ ունեն բազում խնդիրներ, հազիվ հանապազօրյա հացն են վաստակում, շոր ու շերտ է պետք, բայց գումարները նպատակային ծախսելու փոխարեն՝ ամանօրյա ճոխ գնումներ են անում ու Նոր տարի անում։
Հիմա մեկ հարց ևս․ նոր կառավարության անդամներն իսկապե՞ս մտածում են, որ այդ օրը ճոխ տոնելն ավելի առաջնայինն է, քան սոցիալական որևէ հարց լուծելը։
Ինչպես ասում են՝ մեր քաչալ գլխին, 124 մլն դրամի քեֆ անելն էր մնացել․․․