«Ժերտվա ենք տալիս Սանասարյան Դավիթին» օպերացիան մոտենում է իր կուլմինացիային
ՀՀ ՊՎԾ ղեկավար Դավիթ Սանասարյանի և առհասարակ կոռուպցիոն սկանդալի կիզակետում հայտնված Պետվերահսկողական ծառայության շուրջ ստեղծված կացությունը կամաց-կամաց ավելի է ծավալվում։ Արդեն հայտնի է, որ տեղի է ունեցել առերեսում Սանասարյանի մասնակցությամբ, որից հետո նրան՝ Հայաստանի թավշյա հեղափոխության սիվոլներից մեկին, ներգրավել են քննվող քրեական գործում որպես կասկածյալ։ Կան լուրեր, որ առաջիկա օրերին նրան կառաջադրվի նաև մեղադրանք։
Չի բացառվում նաև կալանավորումը, թեև կրկին մամուլում շրջանառվող լուրերի համաձայն, Փաշինյանն անձամբ դեմ է, քանի որ համարում է, որ սխալ կլինի հեղափոխության սիմվոլներից մեկին կալանավորելը։ Սակայն այն, որ իրադարձությունները նման ընթացք են սկսել ստանալ, խոսում է այլ բանի մասին։ Կոնկրետ այն, որ այս դեպքում կամ Փաշինյանի ուզենալ-չուզենալը այդքան էլ կարևոր չէ, կամ հանգամանքները այնքան լուրջ են, որ Փաշինյանը ստիպված է եղել տեղի տալ, կամ էլ կա այլ հանգամանք և այստեղ նաև որոշակի քաղաքական կամ աշխարհաքաղաքական նյուանս կա։
Դավիթ Սանասարյանը իշխանությունների, այսպես կոչված, «սորոսական թևի» կարկառուն ներկայացուցիչ է, ընդգծված հակառուսական տրամադրություններ ունեցող մարդ։ Նրա հանդեպ քրեական հետապնդման իրականացումը կարող է դիտարկվել որպես հայ-ռուսական հարաբերություններում առկա լարվածությունը հայկական կողմի կողմից ամեն կերպ թուլացնելու ձգտում։ Հիշենք, որ ռուսական մամուլում հրապարակված «թավշիստ» պաշտոնյաների ցանկում Սանասարյանը առաջին հորիզոնականներում էր ռուսների կողմից որպես մերժելի պաշտոնյա համարվողների ցանկում։ Միաժամանակ, արդեն հայտնի է նաև, որ ապրիլի վերջին ԵԱՏՄ միջկառավարական խորհրդի նիստին մասնակցելու համար Հայաստան է ժամանելու Ռուսաստանի վարչապետ Դմիտրի Մեդվեդևը։
Հայաստանի իշխանությունների համար սա հայ-ռուսական պաշտոնական հարաբերություններում առկա լարվածությունը թուլացնելու լավ առիթ կարող է լինել, կամ գոնե Մոսկվայի համար տեսադաշտում պահպանվելու հնարավորություն, եթե հաշվի առնենք, որ առաջիկայում համագործակցության հուշագիր է կնքվելու ԲՀԿ և Ռուսաստանի՝ իշխող՝ «Եդինայա Ռոսիա» քաղաքական ուժերի միջև։ Ու այս համատեքստում լիովին հնարավոր է, որ դեռ ամիսներ առաջ սկսած «Ժերտվա ենք տալիս Սանասարյան Դավիթին» օպերացիան հանգեցվի կուլմինացիայի և այն կապիտալիզացվելով, օգտագործվի, ասենք, Մեդվեդևի բարի ժպիտը շահելու համար։ Ի վերջո, Սանասարյան Դավիթի դիրքերը հիմա բավական թույլ են, իսկ Երևանում իշխանությունները հասկանալով, որ Արևմուտքից ակնկալիքները գրեթե զրոյական են, փորձում է իր ինքնապահպանումը ապահովել Մոսկվայի միջոցով։