Լուծում տվե՛ք, աղբի մեջ ապրել հնարավոր չէ. Արիանա Հովսեփյանը՝ Հայկ Մարությանին (ֆոտո, վիդեո)
Քաղաքի բոլոր հատվածներն աղբի մեջ կորած են, այն արդեն լցվում է մարդկանց տները, իսկ դրա մասին փաստում են անընդհատ ցանցում հրապարակված լուսանկարներն ու տեսանյութերը, թե ինչքան կեղտոտ է քաղաքը:
Խմբագրության հեռախոսին անընդհատ զանգեր ենք ստանում, մարդիկ բողոքում են գարշահոտությունից, փնթիությունից և կրծողների առատությունից: Ե՞ս եմ քաղաքապետ, թե՞ Դուք, զբաղվե՛ք այս հարցով, լուծում տվե՛ք, աղբի մեջ ապրել հնարավոր չէ, սա մեր սիրելի Երևանի համար հետքայլ է: Ես պատկերացնում եմ, թե ինչ կանեիք նախկինում, եթե հանկարծ ձեր շքամուտքի մոտ աղբ կուտակված լիներ, Ֆեյսբուքում պաթոսախառը գրառումներով օր ու գիշեր խնդիրը կբարձրաձայնեիք և քաղաքական դիվիդենտներ կհավաքեիք:
Սա ամենաթողության դասական օրինակ է և հետևանք՝ տաք գլխով ընտրության գնացած ժողովրդի արած քայլի: Չէ՞ որ քաղաքի պարագլուխ ընտրեցին և անվերապահ աջակցություն ցուցաբերեցին մի հումորիստի, ով երբևէ կառավարման փորձ չուներ ու չէր պատկերացնում՝ ինչ է նշանակում քաղաք ղեկավարել:
Անցել է արդեն «թողեք թող աշխատեն» պահը և եկել է կոնկրետ պահանջներ ներկայացնելու ժամանակը, մարդը չի կարող բազմել աթոռին, օգտվել ղեկավարին ընձեռված հնարավորություններից իսկ պարտականության կատարման ժամանակ թերանալ:
Ժամանակն է ասել Մարությանին, որ այլևս անկարող եք քաղաքը ղեկավարել, քանի դեռ այլ ոլորտներ էլ չեք ապականել, պարզապես հեռացե՛ք: Նախքան ընտրվելը չգիտեի՞ք պայմանագրերի մասին, իսկ ո՞ւր կորան տրված խոստումները, այսինքն՝ օ՞դ էր, ամեն ասած խոսք, PR-ի և մի քանի ավել ձայն փախցնելու միջո՞ց էր:
Չնայած, այս քաղաքական թիմի յուրաքանչյուր անդամի խոսքը կարելի է կասկածի տակ դնել և ժամանակն ինքը կապացուցի, որ դրանք ամբողջովին խաբկանք էին՝ ստեղծված կուրորեն հավատացող ժողովրդին:
Պետք է նկատեմ, որ այսպես շարունակելու դեպքում Նիկոլն ու իր թիմը երկար չեն մնալու, քանի որ տապալում են յուրաքանչյուր ոլորտ՝ հերթով, կարգով ու սեղմ ժամկետներում:
Ներկայացնում եմ նաև կից կադրեր, որոնք ստացել եմ քաղաքացիներից: Այսպիսի լուսանկարներ ու տեսանյութեր ստանում եմ գրեթե ամեն օր:
Արիանա Հովսեփյան
NEWSPRESS.am-ի հիմնադիր-տնօրեն