Նոր հեղափոխության ժամկետը հայտնի է
Հեղափոխությունից անցել է արդեն գրեթե մեկ տարի, բայց իշխող քաղաքական ուժն այդպես էլ չի կարողանում ստանձնել պետության կառավարման ղեկն ու գործ անել։
Ողջ քաղաքական մեծամասնությունը լծված է կեղծ քաղաքական օրակարգեր նետելով հետո դրանք հերքելով, նույնաբովանդակ հարցազրույցներ տալով, հերոսանալով և այս ամենն արվում է պետությունը կառուցելու ֆոնին։
Հայաստանի տնտեսությունը, չնայած հայտարարված ներդրումայնին բումին, այդպես էլ շարունակում է տեղում մնալ, ու դա թաքցնել չի ստացվում անգամ Տնտեսական զարգացման և ներդրումների նախարարության պատասխանատուների և կառավարության կազմում ընդգրկված շատ քիչ թվով մասնագետների մոտ։
Չկա տնտեսական զարգացում, քաղաքական հստակ օրակարգ, իսկ արտաքին քաղաքականության դեպքում առհասարակ տիրում է օրակարգի բացակայություն։
Հասարակությունն այլևս հոգնել է իշխող քաղաքական ուժի՝ նախկիններն են մեղավոր գրությամբ պաստառների ցուցադրումից ու սեփական անկարողությունը հների վզին փաթաթելու սովորությունից։ Այլևս անհետաքրքիր են դառնում ով մեզ քննադատում է՝ հակահեղափոխական է, ուրեմն՝ պետք է պառկի ասֆալտին ձևակերպումները։
Շարքային քաղաքացին կանգնած է սոցիալ-տնտեսական լրջագույն խնդրի առաջ՝ քանի որ հստակ գիտակցում է, որ երկրիրն առաջ է գնում միայն խոսքով, իսկ իրականում քայլ առ քայլ գլորվում է ետ․ էլ չենք խոսում ազգային արժեհամակարգի կտրուկ նահանջի մասին, որն, ինչպես հասկացանք, շատ թեթև են տանում իրենց եվրոպական արժեհակամարգի խիստ կրողներ որակող կառավարության ղեկավարն ու նրա թիմակիցները։
Մարդու իրավունքների անվան տակ այլևս վտանգված են մեր՝ մեծամասնության իրավունքները։
Ու հենց այս պայմաններն են, որ հող են նախապատրաստում մինչև տարեվերջ քաղաքական այս մեծամասնությանն այլընտրանք ձևավորելու համար։
Նիկոլ Փաշինյանն ու իր թիմն ընդամենը մի քանի ամիս ժամանակ ունեն իրենց խոստացած տնտեսական հեղափոխությունը գործով ապացուցելու համար, հակառակ դեպքում՝ երկիրը կանգնած է նոր հեղափոխության և նոր իշխանական համակարգի ձևավորման շեմին, իսկ երկրում աջ ու ձախ ծավալվող բողոքի ակցիաներն այդ ժամկետն էլ ավելի են մոտեցնում։
NEWSPRESS.am