Սա քաղաքական պրովոկացիա է. Փաշինյանը՝ ԱԺ-ում տրանսգենդերի ելույթի մասին
Վարչապետ Նիկոլ Փաշինյանը մաքսատուն կատարած իր այցելության ժամանակ անդրադարձավ ԱԺ-ում ելույթ ունեցած տրանսգենդեր Լիլիթ Մարտիրոսյանի հետ կապված աղմուկին:
Նա լրագրողների հետ զրույցում նկատեց, որ Մարտիրոսյանը ՀՀ քաղաքացու անձնագիր է ստացել ՀՀԿ-ի օրոք:
«Ուզում եմ ասել հետևյալը. 2015 թվականին ՀՀ իշխանությունը՝ պահպանողական, ընտանեկան արժեքների, ավանդական արժեքների պահապան իշխանությունը՝ ինչպես իրենք են իրենց անվանում, ՀՀ քաղաքացի Վաղարշակ Մարտիրոսյանի անձնագիրը վերցրել է և նրան տվել է ՀՀ քաղաքացի Լիլիթ Մարտիրոսյանի անձնագիրը: Ընդ որում, սեռն անձնագրում գրել է արական: Հիմա ՀՀԿ-ակաների շարքում ընդունվա՞ծ բան է, որ արական սեռի ներկայացուցչի անունը Լիլիթ է: Այդ ի՞նչ հարցեր են դնում: ՀՀԿ-ական իշխանությունն այդ մարդուն տվել է ՀՀ քաղաքացու անձնագիրը՝ սեռն արական, նրան ընդգրկել է ընտրական ցուցակների մեջ, նրան օժտել է ՀՀ քաղաքացու բոլոր իրավունքներով և պարտականություններով՝ առանց բացառության»,- նշեց Փաշինյանը:
Փաշինյանն այս հարցում մեղադրանքներ հնչեցրեց նաև ուղղված «Բարգավաճ Հայաստան» խմբակցությանը:
«ԲՀԿ-ն ինչի՞ց է բողոքում: Ես պետական պահպանության ծառայությունից գրավոր բացատրություն եմ պահանջել և ինձ տվել են փաստաթուղթ, որ Նաիրա Զոհրաբյանն է ստորագրել ցուցակը: Երբ իմացա, թե խորհրդարանում ինչ է կատարվել՝ մտածեցի, որ դա լավ կազմակերպված պրովոկացիա է՝ հեղափոխության և կառավարության դեմ»:
Այնուամենայնիվ, Փաշինյանը տրանսգենդերին չի մեղադրում, քանի որ նայում է նաև հարցի մյուս կողմին՝ մարդու իրավունքների պաշտպանության տեսանկյունից:
«Դա մարդու իրավունքների պաշտպանության հանձնաժողովի նիստ էր, հիմա հարց եմ տալիս բոլորին՝ ՀՀԿ-ի իշխանության օրոք ՀՀ քաղաքացու անձնագիր ստացած Լիլիթ Մարտիրոսյանը մա՞րդ է, թե՝ ոչ: Թող բոլորն այս հարցին պատասխանեն՝ հոգևորականները, ՀՀԿ-ականները, ԲՀԿ-ականները, պահպանողականները»:
Փաշինյանի կարծիքով՝ այս ամենը պրովոկացիա էր՝ կազմակերպված ԲՀԿ-ի կողմից:
«ԲՀԿ խմբակցությունը պետք է մտածի, որ հանձնաժողովի իրենց ներկայացրած նախագահն արդյոք մարդու իրավունքների պաշտպանության հանձնաժողովի նախագա՞հ է և, ընդհանրապես, համապատասխանո՞ւմ է անհրաժեշտ նվազագույն չափանիշներին: Թե՞ ամբողջ խնդիրն այն էր, որ կազմակերպեն պրովոկացիա և թիրախներն ուղղեն «Իմ քայլը» խմբակցության դեմ: Սա քաղաքական պրովոկացիա է»,- նշեց Նիկոլ Փաշինյանը: