ՍԱՊԾ-ում տեղյակ չեն․ սովետական բարքերն են այնտեղ
SAS սուպերմարկետների տիրոջը՝ Արտակ Սարգսյանին, երեկ որպես ՀՀ սննդամթերք սպառող ՀՀ քաղաքացի, նվեր էի ուղարկել նույն սուպերմարկետից գնված փչացած երիշիկեղենը։
Այդ մասին նաև գրառում էի արել սոցցանցի իմ էջում և այն տեղադրել նաև NEWSPRESS.am կայքում՝ «Նվեր ՍԱՍ-ի Արտակին» վերնագրով։
Ու մինչ այդ հրապարակումը հատեց 13 000 դիտումի շեմը, իսկ նյութի վերաբերյալ էլ օգտատերերը ողջունեցին սպառողին հիմարի տեղ դնելու արտակսարգսյանական գործելաոճի մասին բարձրաձայնումս, պարզվում է` այդ խնդրով զբաղվելու համար պետությունից փող ստացող գերատեսչությունում դրա մասին տեղյակ չեն՝ քար լռություն է։
Խոսքն այս պարագայում Սննդամթերքի անվտանգության տեսչական մարմնի մասին է։ Որպես կանոն՝ պետք է այդ մարմնում լինի գոնե մեկն, ով աշխատանքային ժամերին պարտավոր է մոնիթորինգ անել սոցցանցերն ու մեդիան՝ հասկանալու համար, թե ով իրենց մասին ինչ է գրում, որովհետև անհերքելի է, որ հասարակությունն իր ասելիքը տեղ է հասցնում այդ հարթակների միջոցով։
Բայց ինչպես ասում են՝ ձայն բարբառո hանապատի․ հարց է առաջանում՝ կա'մ այդ մարմնում այդ կարևոր գործառույթն իրականացնող աշխատակից չկա, կա'մ, ասել վարչապետի, անգործ նստած են, կա՛մ գործում է երրորդ տարբերակը՝ ՍԱՊԾ-ում դեռ սովետական բարքեր են տիրում ու նրանց թվում է, որ իրենց կայքում թեժ գծի հեռախոսահամար է նշված, ուրեմն կա՛մ քաղաքացիները պետք է օգտվեն դրանից՝ կա՛մ հանգիստ նստեն տեղները։ Կա նաև 4-րդ տարբերակը՝ ՍԱՏՄ պետ Գեորգի Ավետիսյանը կատարյալ անգործության է մատնված՝ դարձյալ հարկատուներիս հաշվին։
Ու այսպես, աշխարհից կտրված, բայց այդ նույն աշխարհում ապրում ենք․․․
Արիանա Հովսեփյան