Երբ «բլթացնելուց» առաջ մտածել չկա
Այն, որ Ազգային ժողովի «Իմ քայլը» խմբակցության պատգամավորներն իրար հերթ չտալով խայտառակում են ռեսպուբլիկան, պարզ է բոլորիս և ասվածի ապացույցն այսօր «Հրապարակ» օրաթերթում հրապարակված հոդվածն է, որը բացահայտել է քաղաքական մեծամասնության ողջ պերճանքն ու թշվառությունը։
․
ԱԺ «Իմ քայլը» խմբակցության պատգամավոր Սերգեյ Մովսիսյանից լրագրողը հետաքրքրվել է՝ իսկ ի՞նչ պետք է անեն ապրիլի վերջին նշվող «Քաղաքացու օրը» այն քաղաքացիները, որոնք չեն մասնակցել հեղափոխությանը կամ դեմ են եղել դրան։
«Թող չնշեն, ի՞նչ է եղել»,- պատասխանել է պատգամավորը, ապա ինքն իրեն ուղղել՝ «Իրենք էլ թող նշեն»։
Իսկ լրագրողի հարցին՝ հնարավո՞ր է ղազախների օրինակով անվանափոխեք մայրաքաղաքը, պատասխանել է․
-Չգիտեմ, չեմ կարող ասել։
-Այսինքն՝ հնարավո՞ր է անեք նման առաջարկ։
-Չի բացառվում, ոչինչ չի բացառվում:
Օրաթերթի այս հրապարակումն աղմուկ բարձրացեց՝ իշխանական պատգամավորը սկսեց քննադատվել իր հնչեցրած անոմալ մտքերի համար, ինչը շտապեց կանխել նորաթուխ քաղաքական գործիչը՝ իր ֆեյսբուքյան էջում գրելով, որ լրագրողը խեղաթյուրել է իր խոսքը.
«Հարգելի հայրենակիցներ, տեղեկացնեմ, որ hraparak.am-ը ինձնից վերցրած հարցազրույցը հրապարակել է ամբողջությամբ խեղաթյուրելով իմ խոսքի բովանդակությունը»,-գրել էր պատգամավորը, ինչին շտապել էր պատասխանել նյութի հեղինակն ու ջախջախել պատգամավորին։
Լրագրողը պարզապես հրապարակել է պատգամավորի հետ զրույցի ձայնագրությունը, ինչից ակնհայտ է դառնում, որ պատգամավորն իր կարճ խելքով իսկապես չի բացառել Ղազախստանի օրինակին հետևելը։
Թեև լրագրողի կողմից ձայնագրության հրապարակումից հետո «Իմ քայլի» որոշ պատգամավորներ շտապել էին նեղն ընկած պատգամավորի պաշտպանի դերում հանդես գալ, սակայն պարզից էլ պարզ է, որ պատգամավորն ինչպես իր թիմակիցներից շատերը, հերթական անգամ տապալվել է։
Հավանաբար, այս մեկի սխալները ևս Փաշինյանը կսրբագրի հերթական ասուլիսի կամ լրագրողների հետ հարցուպատասխանի ժամանակ։ Իսկ ցավալին այն է, որ այդ սրբագրումներից այդպես էլ դասեր չեն քաղում հարկատուների հաշվին ապրող և քաղաքականությունից հազարավոր կիլոմետրեր հեռու գտնվող մարդիկ։