Վանաձորի դրամատիկական թատրոնի տնօրեն՝ «քայլարած» լինելու համար
Այսօր՝ ապրիլի 3-ին, պաշտոնապես հայտարարվեց, որ Վանաձորի Հ. Աբելյանի անվան պետական դրամատիկական թատրոնի տնօրենի պարտականություններն ստանձնում է Լուսինե Սահակյանը: Նրան կոլետկիվ է ներկայացրել անձամբ Մշակույթի նախարարի պաշտոնակատար Նազենի Ղարիբյանը։
Ըստ օդում կախված լուրերի՝ Լուսինե Սահակյանը Լոռու մարզպետ Անդրանիկ Ղուկասյանի մտերիմներից է՝ բարեկամուհին, ու նաև նրա հետ քայլարածներից է: Ու պատահական չէ, որ Լուսինեն հայտնվել է այս պաշտոնում, հատկապես երբ Նազենի Ղարիբյանն իր հարցազրույցներից մեկում հաստատել է, որ ինքը վստահում է միայն քայլարածներին։
Ինչևէ․․․․
NEWSPRESS.am-ի տեղեկություններով՝ Լուսինե Սահակյանը փորձել է զբաղվել լրագրությամբ։ Դեռ տարիներ առաջ՝ ուսանող ժամանակ, նա փորձեց իր առաջին քայլերն անել Վանաձորի հեռուստաընկերություններից մեկում, սակայն դա մնաց որպես անհաջող փորձ։ Թեև նա ինքը շատ վայրերում իրեն ներկայացրել է իբրև լրագրող, սակայն այդպես էլ լրագրող չդարձավ՝ լրագրությունը նրա մոտ չստացվեց։
Լուսինե Սահակյանը՝ որպես բանասեր, դասավանդել է Վանաձորի պետական մանկավարժական համալսարանում և Երևանի թատրոնի և կինոյի պետական ինստիտուտի Վանաձորի մասնաճյուղում: Ասում են, օգտագործելով որոշ լծակներ՝ աշխատել է նաև Վանաձորի կերպարվեստի թանգարանում:
Հիմա էլ, քայլելու և մարզպետի բարեկամը լինելու շնորհիվ՝ տնօրենէ դարձել: Ու չնայած այն բանին, որ ներքին դժգոհություններ կան, սակայն բոլորը լուռ են. դե նախ դա կդիտվի որպես բոյկոտ՝ մարզպետի դեմ, ու նաև հակահեղափոխական քայլ՝ քայլարածի դեմ...
Մի խոսքով՝ կարելի է ասել, տնօրենի հարցում Աբելյանի անվան դրամատիկական թատրոնի աշխատողների բախտը չի բերում:
Հիշեցնենք, որ մինչ այս, Աբելյանի անվան թատրոնի տնօրենի պաշտոնը զբաղեցնում էր դերասանուհի Ագնեսա Շահնազարյանը, ով նշանակվել էր 2016 թվականին։ Այն տարիներին նրա նշանակումը ևս մեծ աղմուկ բարձրացրեց, քանի որ վերջինս, մեղմ ասած, տնօրեն դարձավ զոռբայությամբ։