Ամենամեծ ստվերը մանրածախ առևտրի ոլորտում է․ Անանյանն ասաց, թե ինչու իր և Փաշինյանի թվերը չեն համընկնում
ՊԵԿ նախագահ Դավիթ Անանյանը պարզաբանեց, թե ինչու ստվերային տնտեսության հետ կապված իր և վարչապետ Նիկոլ Փաշինյանի թվերն իրար չեն համապատասխանում։
Ըստ Անանյանի՝ Հայաստանում ստվերը 25 տոկոս է, իսկ Փաշինյանը երեկ՝ մարտի 28-ին, ԱԺ-ում հայտարարեց, որ ԱՄՀ-ի (Արժույթի միջազգային հիմնադրամ) գնահատմամբ` Հայաստանում մինչև 50-60 տոկոս ստվեր կա։
Կառավարության նիստից հետո Դավիթ Անանյանն արձագանքելով լրագրողների համապատասխան դիտարկմանը, նկատեց, որ միջազգային տարբեր կառույցներ տարբեր ցուցանիշներ են ներկայացնում, իսկ վարչապետն այդ կառույցներից մեկի ցուցանիշն է հնչեցրել։
«Այնպես չէ, որ այդ հնչեցրած գնահատականն իրականությանը համապատասխանում է, բայց այդ մեթոդաբանությանը մենք դեռ պետք է մեր մոտեցումներն ասենք»,- ասաց Անանյանը։
Իսկ ՊԵԿ նախագահի հնչեցրածը՝ ՀՀ վիճակագրական ծառայության հրապարակած թիվն է՝ 25 տոկոս, որը վերաբերում է «չհաշվառվող տնտեսության» ցուցանիշին։ Անանյանը բացատրում է․
«Չհաշվառվող տնտեսություն ու ստվերային տնտեսությունը տարբեր մեթոդաբանությամբ են հաշվարկվում։ Դրանք մեթոդաբանական խնդիրներ են, որոնց դեպքում 25 և 50 տոկոսը կարող են համադրելի ցուցանիշներ չլինել»,- ասաց Անանյանը։
Իսկ թե, ի վերջո, որքան է ստվերը Հայաստանում՝ Անանյանը չշտապեց նոր վեր հրապարակել, բայց ընդգծեց՝ ամենամեծ տվերը Հայաստանում մանրածախ վաճառքի ոլորտում է, իսկ խոշոր սուպերմարկետներում այն ավելի փոքր է: