Մոսկվան հասկացնում է, որ դեռ ժամանակը չէ
Արդեն հայտնի է, որ մարտի 29-ին Ավստրիայի մայրաքաղաք Վիեննայում տեղի կունենա Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը։ Այն կանցնի ԵԱՀԿ ՄԽ համանախագահների հովանու ներքո՝ Ղարաբաղյան կարգավորման գործընթացի օրակարգով։ Այս առնչությամբ հատկապես ռուսական մեդիայում բավական հետաքրքիր մեկնաբանություններ են սկսել հնչել։
Այսպես, ԱՊՀ երկրների ինստիտուտի փոխտնօրեն Վլադիմիր Եվսեևը կարծիք է հայտնել, որ սպասվող հանդիպումից մեծ ակնկալիքներ ունենալ պետք չէ, քանի որ կողմերի միջև եղած հակասությունները ոչ մի կերպ չեն թուլացել այլ ընդհակառակն, ավելի ցցուն են դարձել։ Ավելին, ռուսաստանցի փորձագետը կարծում է, որ Բաքուն ավելի կոշտացրել է դիրքորոշումը, վերադարձել սադրանքների՝ իր սիրած քաղաքական գծին և պարզապես սպասում է հարմար առիթի՝ կրկին ռազմական բախում սկսելու ու 2016-ի ապրիլը կրկնելու համար։ Փորձագետն իր խոսքում հատկապես շեշտել է այն, որ ադրբեջանական կողմի համար ոչ միայն անվտանգության գոտու, այլ նաև ողջ Լեռնային Ղարաբաղն իր կազմ վերադարձն է ընդունելի տարբերակ, ինչը նաև նշանակելու է, որ Լեռնային Ղարաբաղի հայ բնակչությունը հեռանալու է այնտեղից։
Այս պայմաններում, հասկանալի է, որ խոսք լինել չի կարող Ստեփանակերտի՝ բանակցային սեղան գալու կամ վերադարձի մասին։ Այս հարցին է անդրադարձել Ռուսաստանի Պետդումայի պատգամավոր Ադալբի Շխագոշևը։ Նա էլ հայտարարել է, որ դեռևս վաղաժամ է խոսել Արցախի՝ բանակցային սեղան վերադարձի կամ գալու մասին և բացի այդ, Երևանի կողմից հնչեցված առաջարկը նա համարել է շատ կտրուկ։ Իհարկե, որևէ ժամանակ դա չի բացառվում, նկատել է ռուսաստանցի պատգամավորը, սակայն հիմա դրա ժամանակը դեռ չի եկել։ Բոլորն էլ համակարծիք են եղել մի հարցում՝ բանակցությունները պետք է շարունակել և պետք է շարունակել խոսել, փորձել գտնել շփման կետեր, ընդհանրություններ։ Այն, որ Ստեփանակերտը մասնակցելու է բանակցություններին՝ սահմանված է նաև Մադրիդյան հայտնի սկզբունքներով, և, ըստ ամենայնի, Մոսկվան հասկացնում է, որ կամ դրա ժամանակը դեռ չի եկել։ Իսկ Մարիա Զախարովան էլ հայտարարություններ է արել այս առիթով, որտեղ ասվում է, որ Ստեփանակերտի մասնակցությունը բանակցություններին՝ պետք է համաձայնեցնեն Բաքուն եւ Երևանը։