Կենսաթոշակների բարձրացման նախագիծը վերաբերում է «սովամահ չլինելուն»․ Արարատ Միրզոյան
Ազգային ժողովում ընթանում է «Պետական կենսաթոշակների մասին» ՀՀ օրենքում լրացումներ և փոփոխություններ կատարելու նախագծի քննարկումը։
Աշխատանքի և սոցիալական հարցերի փոխնախարար Սմբատ Սաիյանը ներկայացրեց շուրջ 18 հազար քաղաքացու համար կենսաթոշակը 25․500 դրամ դարձնելու մասին նախագիծը։ Այսինքն՝ 12 տարի և ավելի քիչ աշխատած կենսաթոշակառուները կստանան ֆիքսված 25 500 դրամ կենսաթոշակ:
Իշխանության ներկայացմամբ՝ այս նախագիծը, որը նախատեսվում է հաղթահարել աղքատության շեմը։
Արձագանքելով Սմբատ Սաիյանին՝ ԱԺ «Բարգավաճ Հայաստան» խմբակցության պատգամավոր Տիգրան Ուրիխանյանը նկատեց, որ 25 հազար դրամ տալով մարդկանց վիճակն էական փոփոխություն չի կրի։
«25 հազար տվեցիք մարդկանց, ու նրանք այլևս ծայրահեղ աղքատ չե՞ն»,- հարցրեց Ուրիխանյանը։
Փոխնախարարն արձագանքեց, որ թոշակառուն կանցնի ծայրահեղ աղքատության շեմը․ «Բայց աղքատությունը հիմնականում այլ կերպ է հաշվարկվում՝ ընտանիքի կազմով, ու եթե որպես անհատ կենսաթոշակառուն հաղթահարել է այդ շեմը, նա կարող է շարունակել մնալ աղքատ ընտանիքի անդամ»։
«Լուսավոր Հայաստան» խմբակցության պատգամավոր Մանե Թանդիլյանն էլ նկատեց, որ բացի կենսաթոշակ բարձրացնելուց, հարկավոր է թոշակառուներին նաև լրացուցիչ արտոնություններ տալ, ինչպես, օրինակ, համերգների և թատրոնների անվճար տոմսեր։
«Այո, նման բան արվում է և պետք է արվի: Նախորդ կառավարության մշակույթի նախարարի և աշխատանքի և սոցիալական հարցերի նախարարի համատեղ ասուլիսով հայտարարվել է այն մասին, որ կենսաթոշակառուները կարող են ստանալ ներկայացումների անվճար տոմսեր: Ես հուսով եմ` դա շարունակում է գործել, որովհետև այն ժամանակ էլ էր օգտագործվում «դրա փոխարեն թոշակ բարձրացրեք» եզրույթը, բայց և այնպես մարդու կյանքի որակը բարձրացնելը բացառապես դրամական ձևաչափով չէ արտահայտված, այլ նաև իր ապրելակերպի և իր զբաղվածության մասով»,- եզրափակեց նախարարը:
Ազգային ժողովի նախագահ Արարատ Միրզոյանին զարմացրեց քննարկման ուղղությունը։ Նա իր արտահերթ ելույթի իրավունքով նկատեց, որ կառավարությունը բերել է մի նախագիծ, որով ինչ-որ թվով մարդկանց համար հարց է լուծվում, և հնչում են քննադատություններ։
Նա համաձայն է, որ 10 և 12 տարի աշխատած մարդիկ ավելի բարձր կենսաթոշակ ստանալու իրավունք ունեն, բայց, ըստ Միրզոյանի, սա վերաբերում է «սովամահ չլինելուն», որից ներքև թոշակ վճարել չի կարելի:
«Ես հասկանում եմ, որ կամերաների առաջ հաճելի է ունենալ դեմագոգիկ ելույթներ, եթե այդպես է, կարող էի առաջարկել, որ խոսեք՝ իսկ ինչու՞ չի սահմանվում 100 կամ 300 հազար դրամ, կամ մի՞թե հնարավոր է ապրել 50 հազար դրամով»,- նշեց ԱԺ նախագահը՝ պատգամավորներին հորդորելով ավելի սթափ արձագանքել նման փոփոխություններին։
Միրզոյանն առաջարկեց ընդունել, որ կառավարությունն այս նախագծով կարևոր քայլ է կատարում, իսկ ընդդիմադիր խմբակցություններին խորհուրդ տվեց էական վերապահումներ ունենալու դեպքում՝ դեմ քվեարկել օրինագծին։